【復仇者聯盟3】變形俠醫成功跣親蜘蛛俠？ Live住公開海報真身
要數Marvel的劇透王，一定係蜘蛛俠湯賀蘭（Tom Holland）大戰變形俠醫麥克雷法路（Mark Ruffalo），事關兩位不時會在訪問中爆響口，唔覺唔覺咁大爆不少情節，搞到Marvel都對兩位有點忌諱。不過有種態度叫「X」到盡頭就是型，兩位終於修成正果，被Marvel睇中兩位的劇透技，夾手去公布新海報俾大家睇。
機密！唔好公開！
事緣湯賀蘭今日在其IG戶口高興玩直播，因為話變形俠醫麥克雷法路寄了個包裹給他，他強調都唔知入面係乜，揚言要來個直播拆箱，跟Fans 公諸同好。無耐，湯仔就在箱內取出一張全新《復仇者聯盟3：無限之戰》的海報，雖然都只係大大個「A」字，但話晒第一次見街，都幾威。
隨後湯仔再於箱內取出一封信，正當他拿出來細讀時，鏡頭見到封信背後有個Marvel Studio Logo，而且上面大大隻字寫住︰「Confidential Do Not Share」，懵然不知的湯仔繼續讀出信中內容，麥克雷法路在信中大致話張海報專登俾你率先睇呀！唔好咁揚，然後湯仔呢刻先翻轉封信，發現有「Confidential」字樣，嚇到熄機都熄唔切，立即Cut線，場面非常搞笑。
劇透王大對決
雖然呢場好明顯係套路，但專登揀呢兩位朋友「擔正」去演呢場戲，全因兩位都有漂亮的前科，好似蜘蛛仔湯賀蘭，在宣傳《蜘蛛俠：強勢回歸》時，談及戲中的角色未來會有很大篇幅講其成長時說：「彼德柏嘉在未來兩部電影中會變得愈來愈成熟，而《蜘蛛俠：強勢回歸》不會是個終結。」當時主持人立即捉住重點「兩次」？事關當時Marvel只對外公布蜘蛛俠會拍兩集，第三集這個消息在唔覺意之下流出。由於前車可鑑，就連Marvel都對佢小心處理，縱使他有份參與《復仇者聯盟3：無限之戰》的拍攝，但也只給予他一個不完整的劇本，免得一時「大口」爆劇情。
至於變形俠醫Mark Ruffalo，也有兩次劇透經驗，最指標性的一次，莫過於他在《雷神3：諸神黃昏》的首映禮中，同Fans玩完IG直播後唔記得熄機，隨便就將電話收起，雖然畫面只有一片漆黑，但就意外地將電影頭10分鐘的對白繼續Live住同Fans率先分享。而早前佢又有另一次嚴重劇透，話說他在訪問中提到，自己好開心可以跟Cate Blanchett同Tilda Swinton合作，Cate Blanchett在《雷神3》合作過就大家都知，但Tilda Swinton只在《奇異博士》中以上古尊者參與Marve電影，如果Mark Ruffalo講得有合作過，好明顯上古尊者好可能會翻生，並會在《復仇者聯盟3》現身，今次真係多謝阿Mark送一個大劇透俾大家。可見兩位的劇透功力各有高低，今次合組「劇透者聯盟」，Marvel實在有見地。