【真．三國無雙】林雪演董卓超神似 霸氣十足會同古天樂爭貂蟬
撰文：許育民
出版：更新：
電影《真．三國無雙》繼續在紐西蘭拍攝，由選角到造型，電影公司都一直保密，直至兩星期前的開鏡儀式才逐一公開。當大家睇到呂良偉飾演的袁紹，已經覺得近乎百分百還原了遊戲版本時，今日發放由林雪飾演的董卓造型，就更加會震撼你視覺，因為無論樣貌定身形，雪哥都完全係董卓上身，直頭好似孖生一樣。
電影《真．三國無雙》的造型逐一公開，繼早前大家見過古天樂飾演的呂布、張建聲的張飛、楊祐寧的關羽後，昨晚導演周顯揚便在微博發出林雪飾演董卓的造型，對照遊戲中的扮相，兩者的確是無懸念地相似，雖然服裝的用色上有點似包青天，但由於樣貌及身形上的優勢，令大家一看便臣服，真係連Face ID都未必識分。造型之霸氣叫人震懾，而根據故事發展，呢位董卓將會跟古天樂飾演的呂布，爭由古力娜扎飾演的貂蟬，係咪睇牌面未必會輸先！
要數雪哥的神演繹，早在《那夜凌晨 我坐上旺角開往大埔的紅Van》中，飾演紅Van司機已經夠歎為觀止，雖則網絡小說沒有影像，司機的造型只是讀者幻想出來，但雪哥正好將大家心目中的紅Van司機呈現出來，極具味道。
至於點解大家又覺得董卓都好神似，除了跟遊戲造型接近，歷史上董卓也被定性為頗負面人物，他趁東漢末年戰亂頻繁，進兵佔據京城，廢少帝立漢獻帝號令天下。歷史記載他生性兇殘，攬權後又實施各項苛政魚肉鄉民，故令後來各地軍閥要起兵討伐董卓。故要活演這角色，一副兇狠的面相，一個肚滿腸肥的身軀絕不可少，而單是這兩點，林雪已贏在起跑線。