【午夜場】《志明與春嬌》後巷慢慢煲出真愛「我哋又唔係趕時間」

要數港式經典愛情故事，《志明與春嬌》不得不提，一段由後巷煲煙而起的感情，發展出一段姊弟戀，當中有不少情節和對白，至今更成為情侶間朗朗上口的應對，甚至不禁要將自己的另一半，跟張志明同余春嬌比較一番。

年頭上映《春嬌救志明》，令大家有番動力一口氣追番前兩集。這個系列雖然得7年歷史，但好快已經成為大家的集體回憶。3集電影跟不少情侶度過不少個浪漫日子，入面的對話更加是記憶猶新，你又有冇跟過春嬌去gmail開番個「armchannel」email address呢？而那宗網上「意圖行騙案」，又係爆到你反艇。

笑還笑，二人都有溫馨對話的，就如春嬌問志明︰「 你介唔介意我大過你？」志明輕輕一句︰「但係我高過你喔！」一個出自真心沒有堆砌的回應，甜蜜得自然。不過愛情離不開呃呃氹氹，兩位在漫春天一夜，春嬌因哮喘發作，最終二人徒勞無功，但正正因為志明一句︰「有啲野，唔使喺一晚內做晒，我哋又唔係趕時間。」氹得春嬌認定這位就是Mr. Right。不過電影去到最後，為大家揭曉這句說話背後的原因時，就夠你又大笑一場。

一段感情，偶然存下一點呃呃氹氹，好容易就可以過一世，縱使踢爆了，都已經上錯賊船，冇得走啦。