【反黑】招積演技獲認同　張建聲︰《向西》都花3個月去整頹自己

向西都是心機作

6年前張建聲由模特兒轉投演員界，似足一張白紙，當時的他很貪靚，但正因為太貪靚，跟《一路向西》中的角色格格不入。「我成日覺得《一路向西》入面係16歲前的我，好純潔，後來唔肯讀書，群埋班壞仔玩先變成這樣。」當時的張建聲冇演技，但第一部戲就要擔正做男主角，自己都束手無策。「胡耀輝導演好好，同我排足3個月戲，之前份工做Model，落街都要化妝gel頭，這麼姿整怎會是向西？於是導演就捉住我不停練。」

說是練習都未夠貼切，用磨滑可能更精準，導演極希望將原本清純的張建聲重現出來。「直至有一日，已經練到個人好頹，頭又唔gel，隱形眼鏡都冇戴，戴住副眼鏡，單單一件菊花牌背心，短褲拖鞋就搭地鐵由九龍灣返到銅鑼灣公司，導演一見到我這個造型，好興奮︰『係喇！呢個咪就係向西！』這句話足以令我叮一聲，亦令我體會到甚麼叫方法演技，更從此開始愛上演戲。」這種先破壞後建設的做法，很受用，張建聲甚至沿用至今。

的確是，這種方法演技一直有袋住，來到今次《反黑》，他也活用。「記唔記得第一集彬少（吳岱融）打我那幕，我不停發出哀鳴的聲音，這種聲線是我在摹倣狗仔被人追打虐待時的哀鳴。」那個環境的確是一場哀號，自己最尊敬的大佬就在面前，原來是臥底，但阿公又一口咬定自己才是二五仔，那種無助感就只有用哀鳴去表達。「岱融哥打我時更用上真壘球棍，雖然我有加墊，但總有幾下會錯手打中的，所以拍完呢幕自己都有傷。整場戲我都是在地上演，全日未起過身，到拍完我已感到全身乏力豁盡。」

「100分鐘戲有90分鐘見到你，仲諗？」

大家最記得張建聲的三個角色，《一路向西》的向西仔要除衫，《壹獄壹世界》的呂文積要增肥60磅，到今次《反黑》的招積，就拿自己的精神狀態較飛，演戲真的要去到咁盡？「你問我時，我會反問番自己︰『點解要入行先？』你鍾意演戲嘛，現在有戲你演不好嗎？」做任何事都應該由淺入深，這是常人理解的，但張建聲不是常人，他的理解是︰「對於一個初學者，演一些極端的角色，然後才慢慢收細會更好。既然我入行已經是拍三級片，已經都冇框框，做咩唔好好利用這個先天優勢，所以我好相信冇當時的經歷，就唔會有今日的張建聲。」又這樣想，拍完幾部三級片，被定型後要花多十倍努力去洗底，這條數好計嗎？「一部戲，100分鐘有90分鐘都見到你，係咪三級片男星？做咗先算啦！我當時只想大家記得有張建聲這個演員存在，之後條路會好行點。我已經28歲才入行，冇可能再慢慢行。」

份屬同公司，又是好兄弟的王宗堯，除了在感情路上是神級命水，演藝事業上起初都要捱，但近年升上男神後就順風順水，眼見好兄弟如此這般得意，自己又有否一刻羨慕過？「唔得呀！你叫我做男神真的唔識去做，我會唔舒服，你叫我做化骨龍就得！男神我真係Handle唔到，我都唔信自己啦！雖然佢做到嘅我未必做到，但同樣，我做到嘅佢都未必做到啫，每個人都係一個個體，所以冇話羨慕定妒忌。」而家兩兄弟齊齊上位，皆大歡喜啦！