【午夜場】吳岱融都有演《江湖告急》　一開場就寸爆梁家輝

睇《反黑》，吳岱融再次以《巨輪2》的鷲哥造型示人，今次角色叫韓彬（彬少），第一集出場，就亂棍狂毆招積，型到爆。
其實吳岱融的江湖味，又點止由鷲哥開始，佢早在《江湖告急》（2000）內就以大口連一角同梁家輝飾演的任因久講數，句句寸到對方冇訂企。

《江湖告急》是港產江湖片的經典，戲中內容一反傳統，在一片腥風血雨下增添幾分Cult味。至於一開場，梁家輝就要同吳岱融飾演的大口連講數，呢場戲雖然得幾分鐘，但吳岱融就盡顯其氣焰，一味話梁家輝Out，句句窒住晒！

仲以2000年最Hit的IT術語大梁家輝。「你識唔識咩叫上網？」、「咩叫IPO？」、「搞dot com呀！」最寸一句係好話任因久畀佢窒到無聲出，「點解呀？因為我有Point！」當然呢個頭威佢真係拎盡，只係後來被任因久一個爆樽，謝晒，又再俯首稱臣。呢幕好睇在大口連一角演得夠乞人憎，好快就令觀眾投入，而任因久的沉住氣也夠殺食，令最後一下爆樽，有種大快人心的感覺。