【追龍】劉德華再演雷洛 想同甄子丹交換？ 劉︰王晶真係咁問過
一位演員，好難得有個機會可以同一角色演兩次，仲要唔係續集系列。
劉德華於1991年在《五億探長雷洛傳》中飾演雷洛，想不到26年後又有機會演一次，機會難得。
問到甄子丹，如果同樣有這個機會會否考慮？「唔會喇，我都唔想再演歹角。」咁如果下一個合作機會係雷洛跛豪對調呢？
劉德華︰「王晶真係有咁問我呀！」咁會唔會成事呢？
攝影︰江智騫
兩個角色各有難度
今次是兩位巨星首度合作，劉德華坦言冇諗過會在這樣的一部電影合作，斷估都要打吧！不過當華仔知道子丹為角色做足準備功夫時，也笑言︰「咁我要畀心機演先得！」訪問期間，二人非常客氣，你讚我好戲，我讚你好演技，聽到華仔話要畀心機去演，子丹也回番句︰「他演這類角色演到駕輕就熟，我甚至都是看這些電影成長，所以知道可以跟華哥合作，好興奮，不知會發生甚麼事，但已肯定會有很多火花。」
相隔廿多年再演同一角色，華仔覺得轉變甚大，尤其角色的心理狀況。劉德華︰「以前的演繹比較形象化，單面些，今次會多想內裡的心思。今次的雷洛予我的感覺是最強的人，都需要放低或放棄的一刻。」
劉德華學唔掂潮州話
根據真人改編，雷洛的故鄉也是潮州，當年華仔理應也要學講潮州話先係喎！「我練唔到呀！所以我好佩服佢，自己語言天份不高，都是靠死背，所以成套戲來來去去都是講兩句『代輕』（意︰大兄）、『阿直』（意︰阿叔）就算。」
問番子丹，自己答應去學潮州話之後，又有冇後悔呢？甄子丹︰「比我想像中難好多，不過既然接了就要做好佢。我做每一件事，都會問自己做唔做到，然後要相信自己做得到，最後就是點樣去做得到！練潮州話是其中一個方法，給予觀眾新鮮感。」其中「阿兄」一句，就叫他講了幾百次都被老師指不對！「不同地區的潮州話，發音的輕重音都有分別，好難學。」
劉德華︰「晶哥要認真時，冇理由我不在。」
一個角色演出兩次，劉德華過足戲癮，但問到甄子丹如果有這機會可會一嚐？他便急急搖頭。甄子丹︰「年紀大，我希望拍多些開心或正能量的電影，我並非不喜歡演奸角，但演奸角好容易會將那份戾氣帶返屋企，所以每日落妝時，都要自己慢慢沉下來，不想將這份殺氣帶住走。」
不演歹角，轉一轉演雷洛一角又可以嗎？劉德華︰「晶哥真係有問我︰『交換角色再拍多次！』」甄子丹︰「唔好喇，劉生那個是經典，我無謂去觸踫啦！」這下妙傳，華仔也來個回敬︰「佢未演之前我都會諗下，現在算了吧！」二人互笠高帽。
其實今次兩位首度合作之餘，也一起當上電影監製，子丹更是首次當監製一職，點解有這個決定？「我有好多意見，所以好多電影都會參與幕後，雖然我識晶哥好耐，他亦找我合作好多次，但我都驚佢會唔認真！哈哈……」這個時候，劉德華似乎有話要說︰「你問我就知喇！我起初都驚佢唔認真，但慢慢就覺得他今次是來真的。以我和晶哥的關係，如果當佢想認真時，我冇理由不在，所以最終都答應演出，並做埋監製。」雖然晶哥的品質出晒名，但似乎都獲兩位巨星默默支持，最多行多步，做埋監製咁解。
鳴謝︰
甄子丹
化妝：諺瞳.小白
髮型：Jacky Leung @IL Colpo PP
劉德華
化妝及髮型：LAI
服裝：Olivia