【午夜場】賽車首選鄭伊健　屬於香港的《極速傳說》

今個星期《寶貝神車手》（Baby Driver）上映，睇到男主角跟住音樂狂野飛車，又勾起內心深處對速度的浪漫激情。回望1999年《頭文字D》未有真人版，劉偉強導演早有先見之明搶先拍了部「致敬」作《極速傳說》，搵型仔鄭伊健擔大旗同任達華街頭鬥車，快到「連車尾燈都睇唔到」。

話就話《烈火戰車》續集，實質同前作亳不相干。伊健飾演的有錢仔阿Sky揸得一手好車，閒時跟其他街頭車手「比武」，威盡香江。有次陳豪飾演的喪偈前來挑戰，敗給阿Sky後更被對方打斷腳。喪偈的大哥鄧風是江湖人，得知細佬出事後計劃向阿Sky報仇。阿Sky的女友Kelly（林熙蕾飾）以及好友趴地熊（譚耀文飾）先後被鄧風間接害死，而他亦被鄧風陷害入獄，保釋後避走生父（柯受良飾）所在的泰國。後來在趴地熊的妹妹Nancy（張栢芝飾）的協助下，阿Sky再度出山，與仇人進行最後的生死戰。

戲中各種疑似《頭文字D》的「飄移」鏡頭當年震驚香港觀眾，不過最令人不能忘懷的，是那些年很性感的林熙蕾、很pure很true的張栢芝還有伊健的六舊腹肌。熱血還熱血，千萬不要在香港街頭隨便「頭搖又尾擺」，亦不要幫架車裝噴射器，好危險的。