【多圖慎入】小丑女新造型曝光　演伊莉沙白女王一世嚇親街坊

在《自殺特攻》飾演小丑女的瑪歌羅比(Margot Robbie)樣靚又演得，早就俘虜一眾觀眾，當大家都期待佢下一部作品有幾美艷性感嘅時候，瑪歌卻扮醜嚇觀眾，佢喺新戲中飾演伊莉沙白女王一世，橙紅色爆炸頭加上面上粒粒，幾乎連樣都唔認得，我唔想相信自己對眼呀！

瑪歌日前喺倫敦拍攝新片《Mary Queen of Scots》，有粉絲喺Twitter po咗幾張相，見到瑪歌驚嚇新造型，橙紅色嘅攣髮爆炸頭，額頭幾乎剷到上頭頂，臉上則一點點紅色粒粒加上凹凹凸凸嘅皮膚，同小丑女相比反差實在太大，睇慣咗小丑女同埋《華爾街狼人》靚到絕嘅瑪歌又點接受到呢？唔怪得好多網友都話唔敢相信啦！

其實伊莉沙白女王一世呢個角色好多人演過，例如英國女星海倫米蘭（Helen Mirren），同埋喺007電影飾演M嘅茱蒂丹契（Judi Dench）等等，但係造型都似乎比瑪歌順眼囉！