【世上最爛電影】占士扮爛片王《The Room》男主角　誓挑影帝寶座

世上最爛的電影係邊一套？《超級學校霸王》？《賭城風雲》？《富山春居圖》？不是不是，被譽為世界上最爛的電影，是2003年一套叫《The Room》的獨立電影，由於實在太爛，竟然爛到上了神枱，爛到有大把fans，爛到占士法蘭高（James Franco）要將拍攝花絮拍成另一套電影，究竟《The Room》有幾爛？

你說《賭城風雲》很爛，因為劇情胡亂堆砌笑話笑唔出，但發哥的演技依然有保證；你說《變形金剛》很爛，因為演員無一個到位，但電影的特技依然好睇。不過《The Room》的爛，是非一般的爛，由編、導、演、剪接、音效，甚至特技全部都是災難級，「罪魁禍首」是自資兼自編自導自演的男主角Tommy Wiseau，他是真真正正的「爛片之王」。

首先話你知《The Room》講乜：男主角發現女主角搭上自己的好朋友，完。睇《The Room》，故事係唔重要的，最重要是成套戲無時無刻都有膠位，無端端成班人着晒踢死兔還要在門口掟波，無端端女主角阿媽話自己患咗乳癌但之後提都唔提，無端端有個角色俾人追債但又唔知點解，無端端男女主角要去瞓晏覺跟住變咗露點床上戲。劇情前後不連貫，對白和剪接全部亂來，拍天台戲不知為何要用假到爆的綠幕特技，最大鑊是所有演員的演技水平都低過零，尤其是男主角Tommy，全部對白都是在不清醒的情況下硬背出來，而且從來唔對劇本，別人的對白未講完他已接下去繼續，更不要說任何表情和感情，仲慘過求其落街叫一個大叔做戲俾你睇。

慎入！一片睇晒《The Room》有何笑位（但要記住佢本身唔係笑片）！

爛還爛，但爛到極點便是cult，《The Room》甚至被捧為「爛片界中的《大國民》」，地位超然，戲中飾演第三者Mark的Greg Sestero，2013年出了一本記述《The Room》拍攝逸事的《The Disaster Artist》，寫低所有拍攝時遇過的膠事，早前此書竟被占士和細佬Dave睇中拍成電影版，占士做導演還親自上陣扮男主角Tommy Wiseau，重現佢NG幾百次都講唔到幾句對白嘅名場面，電影早前於SXSW電影節試映後已好評如潮，電影最近亦舉行行內試映，占士被大讚演技出色認為他有很大機會提名來屆奧斯卡最佳男主角，究竟有冇機會呢？一齊睇片！