馬國明愛陪老婆煲《On Call》 高海寧考慮嘗試追男仔︰要主動啲

馬國明愛陪老婆煲《On Call》 高海寧考慮嘗試追男仔︰要主動啲
撰文:許育民
出版:更新:

由馬國明、高海寧主演的賀歲片《麻雀女王追男仔》,是兩位第一次擔正的香港電影,二人都覺得第一部擔正的港片已經是賀歲片,非常開心,既冇票房壓力,又有紀念價值。戲中馬國明是位潦倒的科學家,一直懷才不遇,偏偏身邊就有個高海寧情人眼裏,覺得他是最好的。問到現實中,未走紅前的馬國明,可有這類粉絲支持,殊不知高海寧已搶答︰「佢老婆(湯洛雯)咪係囉!」

馬國明、高海寧主演的賀歲片《麻雀女王追男仔》,是兩位首次擔正的香港電影,二人笑言今次好值得紀念。(梁碧玲 攝)
馬國明、高海寧主演的賀歲片《麻雀女王追男仔》,是兩位首次擔正的香港電影,二人笑言今次好值得紀念。(梁碧玲 攝)

打麻雀最講演技

高海寧演的是「麻雀女王」,但原來兩位都是略懂,未去到麻雀精級數,高Ling更因為今次拍攝,學識不少專有名詞︰「十八羅漢、海底撈月、七隻花一枱花,都係今次先知係咩。不過講到拍麻雀戲,最辛苦是劇組人員,因為每打完一鋪牌,都要花個多小時重新排過,要將麻雀排好,到下一幕邊位拿邊隻又要度清度楚,原來唔簡單。」

高Ling首次演打麻雀戲,坦言是好大的挑戰,特別係表情管理。(梁碧玲 攝)

而對高Ling而言,打麻雀戲係好有挑戰,特別係表情管理︰「拎完牌要做表情,心底裏又有另一副表情,所以打麻雀戲份是極難拍。」咁現實中,演員打麻雀又有冇優勢呢?馬國明︰「又唔使演員,好多打麻雀好叻嘅人,都係冇乜表情,突然就話食糊!」高海寧︰「我表情管理好差,因為我要慢慢砌牌,當我三隻三隻放埋一齊時,對家已經知︰『食得糊喎!』

《麻雀女王追男仔》中,馬國明是個科學家,專門發明一些不設實際的東西。(《麻雀女王追男仔》電影劇照)

兩公婆重温舊劇

馬國明在戲中是個科學家,專門發明一些不設實際的東西,懂欣賞的不多,就只有高海寧給予支持。問到現實中的知音,高Ling立即搶答︰「佢老婆就係個知音。」馬國明也甜絲絲地細道︰「佢會睇番我啲舊劇,仲話自己未入行已經好鍾意睇《On Call 36小時》,劇中我細路死一幕,佢睇到喺被窩喊,好感動。而家喺屋企有時間,都會陪佢重温以前啲劇。雖然我就唔係好想睇,因為覺得自己演得好差,但佢又話唔緊要,仲覺得好得意。」

原來湯洛雯與馬國明的戀情,由小粉絲看《On Call 36小時》開始。(湯洛雯facebook圖片)

除了《On Call 36小時》,湯洛雯最近仲有追番《鐵馬尋橋》同《律政新人王2》。「我本身覺得呢套演得唔好,但同太太一齊睇,個感覺又幾得意,我又會睇番佢套《一笑渡凡間》,回味一下。」

馬國明、高海寧祝《香港01》讀者,大家心想事成,身體健康。(梁碧玲 攝)

高Ling都想主動啲

電影叫「追男仔」,高Ling坦言未試過,但見一直未有着落下,自己都諗諗係咪要積極啲。「我都有諗係咪要實踐一次追男仔,要主動啲。不過戲中我都唔算好主動,反而拍緊套電視劇,就講我向馬明求婚。」以前覺得女性太主動唔太好,但高Ling就覺得時代不同,觀點完全不同。「而家會講女性如何悍衛自己事業,點樣掌握自己人生,要主動追求幸福,不再逆來順受,願意為自己勇敢一次。」

對於生小朋友,馬國明跟太太都有共識,一切隨緣。(梁碧玲 攝)

來到新年,親戚見面仲會有不少提問,已婚的馬國明必答題當然是幾時先生番個?「都係隨緣,可以話有plan或者冇plan,而家老婆心力都放在兩隻貓,有冇小朋友在現階段都冇特別追求,如果個天送到當然會欣然接受。」至於高海寧,當然最常被問到幾時拍拖結婚,去到這些問題,高Ling立即霸氣回應︰「我阿爸阿媽都唔問啦,親戚只會問我有冇首映飛換票證,哈哈……」

+1

正在加載