【黑白迷宮】 任達華再演江湖大佬 伍允龍︰佢揸槍都型過人
撰文：許育民
出版：更新：
還記得電影《古惑仔》系列的蔣生嘛？任達華的演出簡直顛覆了向來社團大佬的形象，斯文有禮又有型，閒來舉鐵健身食西瓜，深得兄弟愛戴。
近年華哥唔單止愛養生，11點就寢，仲愛演差人或正義角色，真係冇做大佬好耐。終於在新作《黑白迷宮》「重出江湖」，飾演黑社會頭目，為社團執行任務。向來就是型的華哥，今次仲同山雞陳小春再聚，感覺返晒嚟。
至於戲中其他演員伍允龍、梁烈唯等一眾後輩，有機會同華哥合作，都冇咩感受好講，因為都唔得閒講︰「華哥一舉一動我們都十分留意學習。」伍允龍說。
「黑白系列」第三部曲
唔講唔知，唔提都唔醒起，2003年曾經有套《黑白森林》，兩年後又有套《黑白戰場》，來到今年，突然有套第三部曲《黑白迷宮》，除了戲名都係黑白字頭，內容上都冇乜大關係，同茶餐廳專用的黑白淡奶更加溝唔埋。
《黑白迷宮》講的係社團頭目大華（任達華 飾）為執行社團下令的追殺任務，組成了六人超強陣容，當中就包括陳小春、伍允龍、梁烈唯、張兆輝等。雖然嚴陣以待，但每每都被對手先行一步。大華開始懷疑團隊內有內鬼。各人開始人心惶惶，互相猜忌，大華更開始看透該任務好可能只係一個幌子，自己似乎被利用去策劃更大陰謀。
要跟華哥學嘢
電影中不乏打鬥及槍戰場面，華哥除了是戲中的大佬，在片場內更是動作指導，不過唔係洪金寶做開那種，係型人動作指導。導演闞家偉就坦言華哥演戲，無論是爆破場面，還是槍戰，都係咁chok咁man。「這就是華哥的魅力所在，配合他精湛的演技，絕對能夠令一部電影的質感昇華。」導演說。
導演已經讚不絕口，演員就更加完全臣服。伍允龍表示：「我們一眾演員都十分敬佩華哥，他一舉一動我們都會十分留意學習，特別是揸槍手勢，特別有型。」大家尤其記得戲中一幕華哥因為醫生拒絕為其受傷的兄弟治療，於是用槍直指醫生個頭，動作流暢亮麗，霸氣十足。