【午夜場】《超級學校霸王》可能係許志安從影以來最好演技一次

九把刀的《報告老師！怪怪怪怪物》，講校園欺凌，總結是欺凌人嘅往往比怪物更可怕。怪物治佢唔到，咁「飛龍特警」又得唔得？唔好覺得好陌生，「飛龍特警」即係《超級學校霸王》（1993）中，幾位由未來2043年嚟到1993年香港，保護余鐵雄法官（張衛健　飾）嘅未來警察，亦即係鐵面（劉德華　飾）、掃把頭（張學友　飾）同發達星（任達華　飾）。

呢套1993年的作品，當年都算陣容強勁，四大天王欠個黎明就齊章，然後主角係當日打算晉身新一代笑匠但挑戰失敗的張衛健。套戲絕對係港產片風味之典範，王晶先睇中電子遊戲《Street Fighter》（街頭霸王）大熱有商機，嗱嗱聲搵齊幾個賣座演員客串幾日，版權方面當然冇諗過俾啦，所以角色名冇跟足原著，用街坊街里打街機時亂改的花名，但咁樣反而有共鳴。然後邊拍邊寫劇本，一頭兩個月就立即拍好起貨上畫，票房收番1,800萬，算係咁。

故事角色仲有參考埋《多啦A夢》，除了張衛健叫大雄，仲有造型激似阿福的許志安。每次出場都有人肉聲效造勢，而且其擦鞋仔角色演得入木三分，牆頭草看風駛艃的性格，簡直歷久常新。睇番安仔其他電影的演出，都真係唔夠呢部放，唔夠呢部入血，所以要揀許志安電影代表作，首選《超級學校霸王》。