臨時決鬥︱古天樂演退休拳王 周秀娜開工即受傷︰啲肉爆開縫5針
香港賀歲喜劇《臨時決鬥》將於明年新春檔期上映，古天樂、Gigi梁詠琪、周秀娜、王丹妮、伍允龍、胡子彤、張文傑及「魚蛋妹」王尹菁等《九龍城寨之圍城》班底及新加盟女主角合演，並由《臨時劫案》導演麥啟光執導，電影今日（26日）舉行開鏡儀式，一眾主演均有出席，為明年賀歲密密趕工。
主演《臨時決鬥》的古天樂、梁詠琪與周秀娜於開鏡儀式後接受傳媒訪問，談到古天樂與梁詠琪繼《嚦咕嚦咕新年財》後再度合作拍攝賀歲片，古天樂笑言：「最大感受係今次妳有個女？」梁詠琪表示：「係呀嗰時未有，依家就有個女。喺《香港仔》我哋有做過夫妻，又係有個女，今次都係有個女！」賀歲新作由《九龍城寨之圍城》班底合演，亦讓「龍捲風」與「魚蛋妹」再次重逢，古天樂表示王尹菁大個不少：「個樣都變變哋，幾個禮拜前先見過，已經唔同咗樣，要快啲拍添呀，如果唔係變咗16歲嘅樣！」
古天樂於《臨時決鬥》裡飾演一位非常打得的拳王，被問及動作武打戲份時，幽默地再三強調：「係退咗休嘅拳王！（要進行訓練？）唔駛！因為我係退咗休嘅！（與城寨同類的回憶片段？）唔駛回憶喇，退咗休㗎喇！」
另一邊廂周秀娜則要做好打戲訓練：「我訓練咗一個月，一直去到10月中開始拍。」娜姐現身開鏡時右腳小腿貼上膠布，竟表示原來是真傷：「第一日開工嗰時就整親！第一日就畀鐵嘅櫈腳整親，即刻去咗醫院、啲肉爆開咗，去咗醫院縫咗5針！」梁詠琪、周秀娜與王丹妮等女演員加盟「城寨班底」，打戲亦由他們重搥出擊，Gigi透露：「我哋四個女仔喺𨋢入面打架！但我唔係打拳，我係扯頭髮嗰啲女仔交！」
早前資深監製兼編劇陳慶嘉提及電影市道低迷，僅有三部港產片同時拍攝，古天樂亦就今明兩年市況作出回應：「即係預測出年風水運程嘛，我諗你年底問蘇民峰師傅會好啲，我唔識預測！我會做好依家手頭上嘅電影工作。」另一部賀歲片在拍攝租用場地上鬧出風波，被指擅闖徐天佑太太的店鋪拍攝，古天樂認為：「本身我係一個演員嚟嘅，租借場地唔係我負責嘅，我真係唔清楚。但我知道呢件事，唔知道當時情況，所以我冇回應啦。」
近日古天樂一段《像我這一種男人》於舞台上撕爛裇衫片段在網絡上翻紅瘋傳，在台上被撕開裇衫露出鋼條型爆肌身材及大量蝴蝶紋身。古天樂受訪時表示略有印象，笑㓈：「嗰時啲裇衫平嘛，其實可以再多幾件！」更表示：「我喺屋企都成日撕，特登買咗好多裇衫返去，冇嘢做咪撕下囉！」至於重演經典片段的可能性，古天樂再發揮幽默本色：「裡面著件樽領，你要我撕裇衫啫，冇話要其他嘢呀嘛！」