重生｜張家輝承認將拍電視劇　關詠荷被讚凍齡︰佢見到我就開心

由張家輝主演，馬浴柯執導及主演的電影《重生》，於今日（21/9）舉行首映禮，二人自《掃毒》合作後，去年一齊拍下《怒潮》，今次已是第三次合作。

張家輝大讚馬導好拍得，創作力驚人，而且電影在內地票房反應不俗，好有鼓舞性。張家輝：「套戲在內地好有韌力，好興奮，至於香港都希望大家多多支持。」問到會否謝票：「叫埋導演一齊，組織二人合唱團。」

有報道指張家輝將會拍回電視劇，這是自《天涯俠醫》（2004）後，足足20年後再拍電視劇，今日家輝都承認確有此事。「因為套電視劇是前TVB拍檔製作，佢哋買咗個IP，在各地都拍攝不同版本，對我來講都好大挑戰，好似傅送奧運火炬咁，自己會唔會比其他版本嘅人演得更好呢？其實我都好懷念拍電視劇那種在充裕空間，讓演員有更多演戲機會。胡杏兒將會演我工作夥伴，而製作時間都冇咁緊逼，一定有得瞓。」

最近太太關詠荷與市民合照，相片上載後被大讚60歲仲好靚，問家輝可有留意報道？他即笑道：「我唔使睇啦，日日都對住佢，梗係靚！（記：太太被人讚Keep住靚有冇好開心？）佢見到我就開心啦。」