【狂獸】余文樂堅去打魚享受漁民樂︰喺水底我好打過張晉！
撰文：許育民
出版：更新：
余文樂這名字，除了受潮界熱捧，有時都會被網民拿來搞下笑，說他是籃球巨星Fisherman Lok，甚至連鄭中基在金像獎頒獎禮上，宣布最佳衣著獎時，也扮到心有不甘說︰「估唔到自己會輸俾個打魚的。」
一直幻想如果有部戲，可以搵余文樂演籃球員或漁夫，咁就正喇。咁啱9月28日上畫的動作片《狂獸》，戲中的余文樂正正就是打魚的，不過打魚只係其外表，真正的身份其實係漁民走私集團主腦，專門落海打撈黑市黃金。
余文樂演走私集團頭子
余文樂在戲中叫江貴成，是漁民走私集團頭子，指揮手下在大海的特定地點撒漁網，撈起價值千萬的黑市黃金。而張晉就是重案督察西狗，一直對江貴成咬住唔放，最終憑線索發現江貴成藏身點原來就在公海，而江亦四面受敵，既被警方追捕，又受走私集團內鬥之苦，迫使要跟操控黑市黃金供應的鬼哥（倉田保昭飾）談判，引發一場水底大戰！
打得夠過癮
由於劇情涉及不少海上情節，拍攝時都增添不少難度，但本身識潛水的余文樂，就表示《狂獸》是他入行以來，打得最過癮的影片。「我都係第一次演反派，更加係第一次挑戰在水上同水底打鬥，戲中要同張晉、家棟同吳樾互打。之前特意練大隻，都係為咗俾張晉打，不過因為我識潛水，所以喺片場都講笑咁話︰『我喺水底好打過張晉！』」
至於另一主角張晉，提到西狗這個狂性大發的角色，他自言是用盡心入面最狂的一面去演，大家會見到最極端嘅張晉。「我希望觀眾走進戲院，睇完呢部電影會記住張晉同所有角色，認為電影有共鳴有意思，我已經好滿足！」電影其他演員陣容更包括林家棟、文詠珊、蘇麗珊和曾國祥等。
+5