古天樂爆衫半裸片出土　舞姿超越《今期流行》身上紋身網民熱議

提起古天樂的歌唱事業，大部分都立即想起勁歌熱舞的《今期流行》，勁到連大阪跳舞團Avantgardey來港宣傳都要學跳。不過古老闆的勁舞又點止得一首，日前網上就流出一條出土片，片中古老闆正在唱出《像我這一種男人》，殊不知去到尾段，來個爆衫騷肌環節，令入看得血脈沸騰，最緊要係身上仲有多個紋身，而當中的圖案更成為網民討論熱點。

歌曲《像我這一種男人》，是來自古天樂2000年，推出首張EP《男朋友》的歌曲，故相信該表演都是2000年發生，流出的影片只有歌曲最後兩句，但畫面就是最精彩。原本身穿藍色裇衫的古生，唱到一句︰「就算我對你再好　亦會比一張紙更薄」身邊的舞蹈員突然將其裇衫扯爛，露出半身黝黑肌膚，雖然未到爆肌效果，但瘦削身形帶有鋼條效果。

爆衫後，古生赤身唱出最後一句︰「除非一天我可給你快樂」然後踢走在面前，剛被扯爛的裇衫，動作瀟灑，有型過《今期流行》。繼而再不斷擺甫士，又露背又扭動身體。對於這條出土片，有網民笑指好尷尬，但亦有讚他當年身形都好睇，又關注當時古生身上的紋身圖案，全為蝴蝶，未知有咩意思。