九龍城寨｜郭富城首度加盟謝票　將夥拍兩位演員締造最動人場面

電影《九龍城寨之圍城》上映剛剛逾一個月，除已宣布票房衝破9000萬，更連續成為票房單日冠軍，即期間所有新上畫電影統統都唔係佢對手，氣勢如虹，繼續向《毒舌大狀》的1億1500萬紀錄進發，勢登上香港影史票房冠軍。

而宣傳人員每個星期都為謝票場人選費盡心思，繼魚蛋妹與魚蛋媽的母親節謝票，之後又有「王九」伍允龍與「九索」朱栢康於佛誕日舉行的「改邪歸正」謝票。來到本周六（8/6），臨近父親節，宣傳人員就為大家締造一個連睇戲都睇唔到嘅溫馨場面。

當日除了安排戲中客串演出，「殺人王陳占」郭富城首度參與為《城寨》謝票外，更找來戲中的太太蔡思韵，與阿仔「陳洛軍」林峯，嚟個「陳占一家團聚場」。由於戲中陳占死得早，根本冇得同洛軍聚首，亦由於片長所限，跟太太都冇同場戲份，所以今次三人在戲外聚首可謂破天荒，成功締造一個睇戲都睇唔到嘅溫馨場面。大家要密切留意公開售票日。