【喵星人】古天樂24年前拍過草蜢MV 蔡一智最妖造型新戲回禮
由陳木勝執導，古天樂主演的合家歡科幻喜劇《喵星人》，將於今個暑期檔上映。古仔今次都主動邀請不少好友客串，其中甚少在電影亮相的草蜢，也客串一角，三位一齊飾演騙徒三人幫，聯手騙取古仔跟肥貓犀犀利，辛辛苦苦賺來的300萬。
唔講唔知，其實古仔早在做模特兒期間，已拍過草蜢MV做男主角，不過當時草蜢未有演出。今次4位終於可以在電影上合作，草蜢都有備而來，其中阿智更恃住自己擁有一把長長秀髮，索性扮女人，仲要係泰女，一副水晶晶嘅造型加濃濃口音，實在太屈機。
其實古仔拍過草蜢《原諒我是我》MV，早在2010年《25 Gra25hopper 繼續忘我演唱會》中已有提過，當時古仔做演唱會嘉賓，幾位舊事重提，仲一齊合唱番《原諒我是我》。當年唔係首首歌都有歌手親自拍MV，有些Side Track就會用風景片或模特兒做主角拍，所以嚴格來說，那次並唔係合作，而隨後幾位亦未有真正合作過，所以今次《喵星人》算係終於一了大家心願，有緣相聚。
戲中草蜢3子蔡一傑、蔡一智及蘇志威，分別飾演騙徒，各具特色，好似傑仔就帶有潮汕口音，阿智就係來自泰國曼谷的騙徒，而蘇老闆就係個偽歷史學家，3人打龍通夾埋騙古仔，令佢要傾家蕩產去買張假藏寶圖。其實，3位的手法比「順豐騙徒」手法更流，但古仔就信到十足十，以凸顯他在戲中夠晒純，夠晒蠢。
當中身為娘娘腔騙徒的阿智，特地塗上紫色指甲油兼畫上粗眼線，連蘭花手都做得相當有韻味，將草蜢「妖爆」形象搬上大銀幕，帶有點人妖味，就連導演陳木勝都忍唔住大讚：「原來3個演戲都幾好笑，除了唱得跳得，搞笑能力都相當高。」問到蘇老闆及傑仔對好兄弟阿智的仿人妖造型有何評價，兩位爽快地答︰「根本就係佢本人！」明知係講笑，不過阿智都急急澄清：「係佢哋逼我做，仲將自己屋企個泰傭動靜投射到我身上添！」咁唔知阿智在戲中會唔會加番句︰「佢都係我同鄉喎！」