【片】跳出嚟：平面設計Freelance　有幾惡做？

平面設計師Moby畢業後一直返Full Time工作，間中接嚇Freelance幫補。呢啲零碎嘅經驗已令佢體會到Freelancer面對嘅種種難處。

Moby以佢朋友為例，粗略估計淨系接平面設計嘅Job，一個月正常大約揾$10000到$12000，而如果加埋其他媒介例如短片、動態圖像等等嘅Job，一個月就起碼可以揾多$3000到$5000左右。

至於設計公會，其實唔需要好大規模，有一兩個有地位有影響力嘅設計師走出嚟，以顧問身份推動成個行業，一齊制定保障設計師嘅行規、公價，甚至系訂法例，進而做一啲監察同埋個別案例跟進，成件事已經會好唔同。可惜，行內比較有代表性、有影響力嘅人都唔會做呢啲嘢。「如果要做就一早做咗啦！」Moby如是說。

傾完一大輪，佢黯然地講咗句：「其實，我曾經發過誓以後唔再接Freelance嘅。」原因都唔駛多講，成日遇到啲客都出蠱惑，即使肯出糧、唔走數，都要拖足半年，甚至一年先收到錢。做到心灰意冷，就發誓唔再接Job做啦。

「但系，發完誓之後發覺，有啲Job系推唔到嘅。就係一啲真系無錢收嘅Job，例如朋友結婚，兄弟搭膊頭之類啦。」有做嚇設計、影嚇相嘅朋友睇到呢度都應該心中有數喇。通常朋友、兄弟叫你幫手，就好少會收錢，就算收都系所謂嘅「象徵式」、「友情價」，又唔想傷感情，就唯有頂硬上，嗰一刻真系會覺得好墮落。

「最揼春嘅系唔知點解呢個行業要咁樣囉。」呢一句，系Moby嘅總結。

到底Freelance作為一種系時間、選擇上自主程度比較高，但同時又要面對好多誤會或者受盡無理待遇嘅職業，仲要挨幾耐，要點樣先可以令自己有餐安樂茶飯？