【同志的勝利】早逝的同志作家，早逝的「鱷魚」

台灣憲法法庭裁定禁止同性婚姻違憲，換句話講即係同性婚姻喺台灣即將合法化。有報導指有關法例會喺兩年內落實。令人諗起，台灣同志廣為流傳嘅經典作，台灣作家邱妙津嘅《鱷魚手記》。

邱妙津係台灣有名嘅女同志作家，曾經被台灣女同性戀者選為夢中情人第一位。喺台灣大學讀完心理學系後，1994年去法國繼續進修，但係喺1995年6月25號，年僅26歲嘅佢喺巴黎屋企自殺。

對於台灣，甚至華人同性戀文化、文學，邱妙津影響重大，台灣女同志到𠵱家都經常用「拉子」、「鱷魚」等等代名詞自稱，出處就係《鱷魚手記》。佢係最早一批公開自己性取向嘅華人同性戀作家，如果華語男同志文學嘅代表作係白先勇嘅《孽子》，女同志代表作就係《鱷魚手記》。

理所當然地，嗰個年代嘅思想、社會氛圍比起現代封閉得多，同性戀者即使對自己性取向有所覺悟，出櫃、搵伴侶等等事情喺當年要比𠵱家更困難，付出更大勇氣。《鱷魚手記》裏面，邱妙津喺每一章都穿插一個寓言故事嘅一部份，鱷魚（比喻同性戀）生活喺普通社會，一般人對鱷魚有着獵奇式嘅好奇，更有人揚言有一種病症，會令人類變成鱷魚，所以要滅絕鱷魚。為咗避免畀人發現自己身份，佢每日都要穿著「人裝」生活。但係，鱷魚心入面其實好寂寞，想被社會大眾接納，更加想搵到其他鱷魚。

除咗鱷魚寓言，小說記述主角（拉子）大學生涯幾段波折嘅愛情，同埋遇到幾個同性戀、雙性戀者嘅想法、遭遇。又以第一身視覺，交代當時社會氣氛下，同志內心深處嘅壓抑、掙扎同痛苦。小說中，有人因為受唔住壓力而強迫自己成為異性戀者，亦有人自我沉淪、遊走喺生命邊緣。

邱妙津嘅早逝，故然係文壇損失，唔知有冇人諗過如果佢今日仲在生，對同性婚姻立法會有咩睇法。同性婚姻立法值得鼓舞，但其實都只係第一步，即使喺𠵱家所謂多元社會裏面，都仲會有人下意識地用性取向作為一種玩笑、嘲笑他人嘅方式。除咗立法，要改變到同志受壓迫嘅處境，更加重要嘅係冇人會再用歧視、獵奇嘅眼光去看待佢哋。