剝削無極限：招募有意加入婚攝行業的奴隸

唔睇由自可，一睇就真係把鬼火！「帶你實戰」、「無任何金錢利益」、「日後介紹工作」。記得近呢一兩年都有上網留意Production House攝影、拍攝助理之類嘅工作，呢啲工都出名人工低，話就話助理，其實即係做臭四，學唔學到嘢就睇師傅肯唔肯教。大部份人工都唔過$12000，最低仲見過$8000，講緊係2016年，以為已經係極限。原來低處未算低，打正旗號For Free都仲有。我諗咗好耐，文中「無任何金錢利益」唔通係指佢幫人拍嘢唔收錢？義拍？

有無人真係Whatsapp佢就唔知喇，不過都奉勸有心入行做攝影、拍片嘅朋友，唔好真係為少少經驗貼埋錢返工，一來要拎經驗唔需要靠呢啲人，就算真係介紹工作都唔慌係好Job，二來真係唔好做水魚兼做爛個市，令人覺得一句「帶你實戰」就唔出錢都請到人。