眼見關愛座爭議　滿站水貨客　90後團隊創作港鐵主題Game

日日返工放工搭港鐵，即使沒遇故障，卻要與其他乘客搶位上車；萬一不幸遇上壞車，那種煎熬，只有香港人才懂。有九十後團隊製作以港鐵為背景的手機遊戲，人人化身主角，穿梭於人群之間，務求順利轉車。

金鐘和北角兩個車站月台，每到繁忙時間，便會變身短跑比賽跑道；車門一開，眾人狂奔，只為快點跑到終點──轉車。

製作手機遊戲「轉車玩完」的Lokson指，轉車好比障礙賽，故萌生整game念頭。

「有人可能對面衝過嚟，要上樓梯落樓梯，之後就有好多人陪你一齊喺度衝，人流好交錯，個感覺就好似真系玩緊比賽」，

公共交通工具是港人生活一部份，「好似城市嘅脈搏」，不時有報道指有人在港鐵便溺、水貨客充斥，Lokson直言「其實呢啲系你生活嘅一部份」，想避都無得避。

遊戲美術設計師Mandy則覺得，港人轉車時相當有趣，「好似衝鋒21咁覺得自己好勁，好快就可以到倒目的地」這種急進轉車法，「反映香港人性格比較急、比較躁底」，笑言「有啲小碰撞呢就會爆㗎喇」，先是出動眼神攻擊，繼而出手推推撞撞。

講到港鐵內最受人關注的日常衝突，非關愛座莫屬。均屬「廢青」年紀的Mandy和Lokson，又點睇關愛座？

「我都系企返喺度」，Mandy指，曾坐在關愛座上，但「你一坐低呢，可能會有啲好奇異嘅目光望住你㗎喇」。為了避免這些目光，Mandy唯有唔坐保平安。

Lokson就認為，關愛座變了一個標籤，又或是變成某些群體「理所當然」的坐位，而事實上「關唔關愛座都好，佢都只系一個座位」。

雖然Lokson自言整game「只系一個毒J喺度尋求共鳴」，但他亦希望可以將社會現象滲入遊戲，再思考現時過著的生活，因為Lokson堅信，「生活中好多嘢都值得人去諗嘅，就唔單系生活咁簡單」。