【大學生Ocamp】玩City Hunt有乜錯？新生應該熱血 唔理世俗目光
「一年容易又Ocamp」，大家有冇在街上遇到班大學生，穿上各種顏色的T-Shirt，突然出現在大街小巷？好多市民都為之側目，認為這班人行為古怪，突然企晒在街上，又會突然跳舞怪叫，都唔知係到做乜！
做得大學生，就係要唔好理世俗的眼光，未至於凡事我行我素，不過集體行動，團隊精神，咁先叫熱血，咁先係春青呀！
年初肆
世界光怪陸離，無人獨善其身。嬉笑怒罵，冷嘲熱諷，皆成文章。有人話，邊個揸住支筆，邊個就是無冕皇帝，就讓我做多一回皇帝。
「做得大學生 就係要唔好理世俗的眼光」
每次大學生玩city hunt，都會被網民狠批，認為是阻街，而且行為低能反智，一啲都唔似大學生。但係做得大學生，就係要唔好理世俗的眼光，未至於凡事我行我素，不過集體行動，團隊精神，咁先叫熱血，咁先係春青呀！唔通叫班大學生縮在校園內，粒聲唔出的在打坐，靜靜地dem beat（叫喊口號）咩，咁樣對得住年輕咩？
Ocamp大學生大晒
每次在街上見到著晒同一系列Tee，在街上玩緊City Hunt的大學生時，我都好感慨，「突然又已一年」。睇住佢哋大熱天時周街走，都戥佢哋辛苦。不過每次見到這情況，都見到路人流露出不屑的眼光，而且議論紛紛，基本上都是一面倒，話這班人都唔知喺到做乜，又嘈又阻街，「乜現在大學就係玩啲咁嘅嘢？」、「Ｏcamp真係反映到香港新一代啲品味愈黎愈低劣！」雖然我都大學畢業了n年，但真係要撐大學生，要同這班freshman評反。其實佢哋玩city hunt有乜問題？佢哋嘈到你幾耐呀！重點係，你有冇資格玩先？
坦白講在香港玩city hunt，無可否認真係會有點阻街。大O的city hunt，隨時有過百人一齊玩。好多商場保安員見到成班大學生著晒系tee走過，都會如臨大敵，隨時準備好會有商戶、顧客投訴，要想盡辦法趕走這班不受歡迎的「客人」。不過，好彩佢哋唔會留在商場好耐，最多咪有一兩個任務路經這裡，咁你都要介意？
作為搞手，當然希望同學仔玩得開心投入。剛入到Ocamp都仲未熱好身，好多團體活動玩起來會有些尷尬，搞手亦好難帶起氣氛。而city hunt就是一個絕佳的機會，𢌿fm有機會多些溝通。始終在街頭會遇到許多突發事情，互相溝通接觸多了，就更容易投入接下來的團體活動。你睇下班人，真係毫不尷尬，大叫dem beat咁投入，就知係一種團隊精神，燃燒緊心中一團火呀！Ocamp就係大學生大晒呀！
睇番oamp裡city hunt這個環節，好多時要去唔同的地方做任務，有時候縱然你在香港生活了十幾年，都總會有些地方係你唔為意，會感到陌生的。但透過這任務，真係大開眼界呀！而且仲有時間和機會畀freshman齊齊傾下點做個task，咁對整個Ocamp都有利。不過今年Ocamp就遇著打風，好多時city hunt真係入埋商場搞。
今年有大學去咗時代廣場入面做任務，結果又被網民狂插。唉，我真係要講句，咁都唔包容吓？商場都未投訴喎，你班網民食住花生都要嘈？與其鬧人阻街，香港人應該學吓體諒！
Ocamp一年一次 香港人應學識體諒
講真，city hunt有幾阻街呀？真係咁嚴重咩？Ocamp一年都係得果幾日啫，阻得你幾多，又唔見你嘈啲旅行團在街上周街走？大學生都一樣有使用街道的權利吧！唔係話大學生就大晒，不過佢哋都有權使用公共地方，行街和去商場，有乜問題？
Ocamp有冇意義，我估只有參加過的人先可以有資格講嘢。至於city hunt這環節，都有好多值得爭議的地方。當然，我都奉勸各位搞手和同學仔要控制吓自律吓，盡量唔好阻咁多位，行埋一邊唔好阻街，可以的話盡量細聲少少，唔好嘈住其他人，記住唔好阻人做生意。其他嘢，大家忍讓吓啦。你又有沒有玩過city hunt，點改先會好啲？不妨留言討論。
你都想成為開筆一份子，稿件可電郵至opener@hk01.com；文章純屬作者意見，不代表開罐立場。