【禁煙】隨街吸煙仲未立法？　應該學吓日本、不丹

究竟邊個發明了吸煙？究竟點解要一路行一路食煙？我知咁係香港唔係犯法，但真係好無公德心囉，有冇顧及過其他人。吸煙明明係對自己無益，對別人有害，點解仲要周圍發放毒氣咁無品？

出街最煩惱的事，莫過於在街上行行吓，突然一陣逆風吹來，慘被二手煙噴到一面都係，都唔明點解，煙民唔行埋一邊，圍爐去食呢？每次遇到咁既情況，我心底裡好想問候佢祖宗十八代，可惜我淆底唔敢上前剷佢。

年初肆
世界光怪陸離，無人獨善其身。嬉笑怒罵，冷嘲熱諷，皆成文章。有人話，邊個揸住支筆，邊個就是無冕皇帝，就讓我做多一回皇帝。

我唔明香港依個咁文明既地方，點解仲容許吸煙這種損人不利己嘅行為。你要慢性自殺我唔阻你，但點解要其他人陪你去死？我知我知，香煙無乜可能全面禁止，吸煙人士有權去吸！政府又要收大量煙草稅嘛！結果只有無視不吸煙人士的權益，二手煙民繼續受害！

試過好幾次，在路上遇到啲人喺我前面吸煙，仲要幾秒噴煙一次，你估條路好闊，你行晒咩？你又唔係火車頭，係咁噴煙，點解要我跟住你，我要左閃右避，閉氣急急步咁走過去。再唔係就要兜路行，買佢怕。我都唔明我做錯啲乜，落個街都要好似過街老鼠咁，又跑又避，你班煙民就理直氣壯，完全唔理其他人嘅感受，一啲公德心都冇。

不丹：全國公共地方禁煙

如果可以學到不丹咁，實行全國禁煙，咁就perfect。因為不丹全國的公共地方都是禁煙的！

再唔係，學吓日本咁有「路上禁煙」條例，規定煙民要在街道上的指定「喫煙所」吸煙。這些半封閉式的「喫煙所」，既可讓煙民有「棲身之所」齊齊打邊爐，亦可還非煙民一條無煙街道。聽聞新加坡即將會有「路上禁煙」條例，不過暫時只係限果幾條大街，但都好過無喇。

超過140個國家　公共、工作場所全面禁煙

再放眼世界，目前全球已有超過140個國家加入「全球菸草控制框架公約」（FCTC）。例如愛爾蘭、挪威、紐西蘭、烏拉圭、冰島、美國、加拿大、澳洲、英國等，都已實施室內公共場所與工作場所全面禁煙，保障不吸煙者免受二手煙危害。

雖然有人話，香港一直是控煙做得最好的地區之一，更可以話是亞洲的先驅。因為早在2007年時，已有全面禁煙的條例，是繼新加坡後，第二個禁止市民在所有食肆室內地方以至室內工作間吸煙的國家（地區）。但由於香港人口實在太密集，在街上吸煙的情況根本沒法改善，一條街上幾個吸煙者在，已令你覺得活在煙霧的世界中。

我強烈反對邊走路邊吸煙的行為，但都明白無可能全面禁煙，但唔該都俾條生路我行，你地去吸煙區慢慢打邊爐啦。大家又同唔同意我嘅睇法？歡迎留言討論吓。

你都想成為開筆一份子，稿件可電郵至opener@hk01.com；文章純屬作者意見，不代表開罐立場。