「一年容易又O Camp」，講起實在感觸良多。O Camp離我其實都唔係好遠，不過真心一屆不如一屆。問心，參加O Camp有幾有用？唔係浪費時間，就係玩低能遊戲，侮辱智慧，你真係仲要參加？

過期大學生曾經的大學生，80後老鬼，身老心不老，自問玩盡大學3年，勁爆回憶同美好經歷，足以講足30年。

O Camp一直都是靠群眾壓力，逼住你玩，在大家親眼見證的情況下，玩踩界遊戲，或是加上不文及低俗動作。就好似「一生人一次」遊戲咁，話間間U都有玩，但個玩法各有唔同，玩到興烚烚，除衫在所難免。

「歡樂漩渦」就連馬桶都玩埋，「毛毛蟲」那些就更不用提，不必要的身體接觸真係有助識新朋友？增加團體合作精神？唔通參加O Camp就要放低尊嚴？任人玩任人抽水都無得出聲，甚至留心靈創傷？為乜呢？

更多關於大學生的內容

【Ocamp獸父出沒？】做過組爸　經歷可以講一世

【大學生Ocamp】玩City Hunt有乜錯？新生應該熱血　唔理世俗目光

【大學詭探】八大好猛？　大學鬼故有冇你嗰間？

O Camp無助取經

去O Camp好多時都是抱住可以向師兄師姐套料的心態，及早知道學系的文化、邊科最實用、邊個導師係killer、邊科可輕輕鬆鬆拿高分咁。但好多時候，O Camp都不會提供到這些資料。去到O Camp都係喪玩為主，仲邊會分享到這類內容。

純粹為識人？

好多人話去O Camp，都係為了盡早識多些人，方便日後做project時唔會無組。但事實上，O Camp得幾日，根本就認識不深。隨時遇到個free rider都唔知。加上O Camp時都未報齊科，上堂時隨時遇唔番。問心果句，朋友圈子好多時候都係開學後先形成。加上未來還有很多活動有機會認識同學，你覺得有差迎新營那幾天嗎？

玩百年不變的無聊遊戲　你頂得順嗎？

除非你個人本身很活潑，喜歡一大班人玩團體遊戲，唔介意和三唔識七的人一起牽手繞圈圈、嘻嘻哈哈咁玩遊戲，不然你一定會覺得這幾天O Camp「超無聊」。如果你不是這種人，卻要跟一群不熟的人待在一起，假裝自己很高興，這絕對是活受罪！

入大學唔玩O Camp會走寶？應唔應該參加迎新營呢？都咁大個人，自己決定啦！咁如果你真係有堅持要去O Camp的理由，不妨留言討論下。

你都想成為開筆一份子，稿件可電郵至opener@hk01.com；文章純屬作者意見，不代表開罐立場。