有線股東會變「申訴會 」　散戶炮轟︰無息派　要多包糖都唔得？

有線寬頻（1097）舉行股東大會，小股東除了批評公司供股手法之外，亦有小股東批評「招呼不佳」，直指「連要多杯咖啡都唔畀！」

有線小股東會上大控訴，楊女士批評有線寬頻的服務「好差」，約職員安裝寬頻機，職員要約三次才能有時間，足足浪費了她三個下午。

委任代表開會　小股東：點解我唔可以有張點心券？

楊女士更表示：「我持有股東11萬股，因為我用100股股票委任了一個代表來開會，頭先去登記的時候，職員話不能領取點心券。我就覺得很奇怪，我持有公司11萬股的股票，都唔可以有一張點心券。我又要搭車喺香港走嚟九龍開會，點解會咁窮呢i-Cable？窮到咁犀利呢？」

楊小姐的言論引起在場一班小股東討論，主席吳天海表示，有關服務水平的意見，他們會和同事研究，有不足之處一定要盡快更正。至於點心券的問題，相信是依據一般公司的方法去做，但亦承諾去了解一下情況。

「要多包糖都唔得　你當股東仔係咩呀？」

吳天海繼續回答其他小股東問題，過了一段時間，另一位葉女士舉手炮轟：「我有一年嚟呢就攞杯咖啡，佢就畀一包糖我，因為我係食甜啲，想要再攞一包，（侍應話）唔得！只可以要一包。係咪窮到連畀多一包股東仔（都唔得）呢？你當我地股東仔係咩呀？係乞兒咋！你明唔明呀？仲有一次飲完一杯我又覺得口渴，再攞一杯，（侍應話）無！無呀！派晒呀！你哋嗰啲咖啡、嗰啲茶呀，一鬼大桶，畀多一杯人哋呀，又值幾多錢啫？我行去麥當勞飲杯咖啡，都係十零廿蚊啫，點解要做到咁恐怖呢？」

葉女士說完，吳天海亦向她道歉。

吳天海承諾檢討服務　以及股東會安排

楊女士之後「接力」砲轟：「你根本上年年都無息派啦，個股本又係度蝕緊，我哋嚟到開會呀，係咪要水都無得飲呢？」

吳天海表示，這項政策會去檢討。