【溫多娜手記】黃國英請同事去山東體驗儒家文化 齊著漢服抄論語
撰文：溫多娜
出版：更新：
豐盛金融資產管理董事黃國英（Alex）每年都會包團請同事去旅行，曾經去過大阪、名古屋、沖繩同北韓等等。今年Alex就親自挑選行程包團，請同事去山東過一場「儒學之旅」，話想齊齊遠離煩囂喎。
Alex透露，旅程途經青島、曲阜尼山、泰安及濟南，其中曲阜尼山係孔子出生地，除咗參觀孔聖舊跡景點孔子像、大學堂、孔廟等，仲有儒家文化體驗，一團人換上漢服cosplay，在老師指導下抄論語。
旅程更包括體驗非物質文化遺產「尼山食禮」，按照古代用餐禮儀的酒局，由司儀唱禮開始，席上宴者亦需要跟從司儀指示。宴會中，更可試玩古代貴族的活動投壺，每人有三箭機會，以三枝箭的距離投中壺則勝，Alex亦投中一箭。食禮以謝福及唱頌作結。