【溫多娜手記】國泰扭虧為盈 即向每位員工派2000蚊
撰文：溫多娜
出版：更新：
國泰航空今日派成績表，公司扭虧為盈賺23億元，除咗向股東增加派息之外，公司亦都向員工發放相當於花紅嘅利潤分成，每位合資格員工獲發2000元。
國泰話，因為舊年大部分盈利係來自附屬同埋聯營公司，國泰和國泰港龍盈利只有2.41億元，如果用以往利潤分成嘅計算方法，同事只有微不足道嘅金額。為咗感謝員工喺轉型計劃嘅努力，所以將利潤分成增加至2000元，作為對同事嘅認同以及感謝。
國泰嘅全球員工有3.24萬人；而國泰和國泰港龍嘅在港員工有2萬人。
國泰喺2016年蝕錢嘅時候，宣布經理級以上員工喺2017年要凍薪；2017年嗰陣，就冇發放花紅。今次業績亮麗，就立即同員工一齊分享成果。