【溫多娜手記】陸叔中環中心Office搬落樓下　私家直播室繼續開咪

長實﹙1113﹚去年分拆中環中心，獲城中不少大孖沙接貨，資深股評人、人稱「陸叔」的陳永陸坐鎮中環中心62樓多年，亦受「波及」。

中環中心62樓由新業主世茂房地產（0813）主席許榮茂接手後，由於另有租務安排，陸叔寫字樓亦因而要搬。陸叔同溫多娜講，依然會租返中環中心，只係搬落較低層嘅33樓，佢講笑話，自己年紀大咗，搬去低層「氣壓」無咁大。翻查資料，33樓由金利豐﹙1031﹚行政總裁朱李月華買咗，業主租客份屬金融界，自然「同聲同氣」。

講起陸叔中環中心嘅寫字樓，溫多娜自然諗起佢個「私家」電台節目直播室。陸叔就話，商台會搵人幫手搬去33樓，認真「畀面」。咁又難怪，佢主持嘅商台節目《人生交叉盤》今日5月就係20周年，應該係香港最長青嘅股評節目，別具意義。陸叔憶述，2000年佢離開大福證券後， 俞琤、阿旦及楊振耀3位商台高層，即刻找佢密斟做節目，由於「友台」亦有意思，而且個直播室響正中環中心，擁有「地利」，於是乎陸叔開出條件，直播室要設係佢中環中心嘅寫字樓，點知3位高層一口答應，陸叔笑言「點抗佢呀？」

講到呢到，各位陸叔粉絲大可放心，陸叔咪照開，節目照講！