【溫多娜手記】「活力午餐」推學童午膳訂餐App　近10間學校使用

溫多娜讀小學嗰陣，每個月訂飯都要將銀行入數紙或者支票釘響訂餐紙上面，再交俾學校老師。不過，依家科技進步，學校、家長、學生都可以用手機訂飯啦。

大家樂（0341）旗下嘅學童午膳供應商「活力午餐」，最近推出咗學童午膳訂餐App，用家首先要登入應用程式做首次登記，就可以揀餐，確認訂單之後可以透過信用卡、便利店或者繳費靈付款。另外，喺App度亦都可以睇返所選餐款、訂購狀態以及付款紀錄。

活力午餐總經理蔡景橋就話，依家流動訂餐系統已經有接近10間學校應用，公司會繼續推出新措施，以及為學校提出適切的協助，令學校同埋家長可以節省更多時間，希望有更多學校使用流動訂餐系統。