【溫多娜手記】太古施銘倫首見傳媒　簡單「貓紙」從容講足8分鐘

太古A﹙0019﹚與太古地產﹙1972﹚新任主席施銘倫（Merlin Bingham Swire）今年7月掌帥印，少有公開露面。臨近聖誕節，太古搞咗場小型酒會，一來同傳媒朋友聚一聚，二來亦畀呢位新主席首度公開亮相。

雖則話「首度」，但施銘倫表現從容，只係準備咗張列點嘅「貓紙」輕鬆講足8分鐘。開始時，施銘倫先打趣話呢個唔係記者會，會盡量簡短，亦不設問答環節。然後就講解下太古最新業務發展，由大力發展鰂魚涌「去中心化」，到內地可口可樂嘅半壁分銷江山都覆蓋埋。

預告國泰將有更多新航點

最為難得嘅係，國泰資料外洩單嘢，佢都無「避忌」，直言過去數個月，經歷咗一些艱難時刻，吸收咗唔少經驗同教訓。言語間，施銘倫對國泰回勇好有信心，相信經過3年重組，公司生產力同效率會進一步改善，仲話食物質素愈來愈好，將有更多新航點。

上任短短幾個月，對集團發展情況了然於胸，皆因呢位施懷雅家族第六代傳人絕非忽然「空降」。佢早於1997年加入家族企業，曾喺內地工作5年，先後擔任可口可樂上海總經理，及廈門太古飛機工程行政總裁。之後雖然飛返倫敦總部，但期間不時停留香港，經驗如此豐富，難怪咁快上手！