【滙豐季績】6厘股息成食息首選？　專家教路先等呢個價位

滙豐控股（0005）公布截至9月底止第3季業績，期內列賬基準稅前利潤按年升逾升28%至59.2億美元，隨即刺激股價展開「獅王復仇戰」，一度急彈近6%，收市報63.55元，仍升超過5%。

滙控一洗近日頹風，加上現價計股息率亦高達6厘，是否「食息一族」追入的好時機？耀才證券研究部總監植耀輝主張投資者「睇息做人」，明言滙控7厘息時「可以考慮」。招銀國際策略師蘇沛豐則稱，滙控季績表現相當「省鏡」，但就建議投資者先待股價回調再行吸納。

翻查滙控業績報告，集團除了盈利增長可人，各項營運數據亦開始「執靚仔」，其中列帳基準營業支出按年削減6.78%至79.66億元（美元‧下同，約625億港元），令收入增長率重新跑贏支出增長率，難怪滙控行政總裁范寧亦向股東大派「定心丸」，揚言有信心能達成全年收入增長率高於支出增長率的目標。

蘇沛豐亦自言對滙控業績收貨，「今次滙控不論係開支定盈利都好過預期，收入增長亦開始跑贏成本，雖然以頭三季嚟計仍未達標，但都算重回正軌。另外，淨息差都輕微擴闊0.02厘至1.51厘，算係唔錯嘅成績表！」

植耀輝稱業績表現只屬中性

惟植耀輝則對「獅王」前景不甚樂觀，表示雖然滙控最新季績雖然好過預期，但只能用「中性」來形容，原因在於其預期信貸損失一環。今年起，滙控實施國際會計準則IFRS9，由以往按不良貸款往績實際產生損失﹙Incurred Loss﹚作提撥基礎，改為按預期損失﹙Expected Loss﹚作前瞻性風險評估。滙控於業績中表示，為應對貿易戰影響，期內經調整預期信貸損失大增至5.07億元（約39億港元）。

植耀輝認為，滙控管理層在預期損失上相對樂觀，「佢第3季減值都係5億美金，唔算好多，萬一經濟真係轉差，對銀行嘅影響最為顯著！」

籲食息族靜候回調再吸納

隨着中美貿易戰不斷發酵，滙控業績難免存在隱憂，但以現價計滙控股息率高達6厘，足以擄獲不少投資者的芳心。蘇沛豐就教路「食息一族」可待股價挨近60元水平才吸納，「大市氣氛麻麻，好多股份股價都比較低殘，滙控亦有機會跟隨回調。」至於短炒又如何？蘇沛豐就坦言水位不多，「估計大概可以去到65.5元，與現價計僅得1.5元左右水位，始終受近日市場氣氛影響，股價要反彈都會有唔少阻力。」

植耀輝則建議，有貨者可繼續持有，無貨者則可以等一等，「依家咁嘅市況，無人知幾多係底，最好係分注買，我覺得7厘息叫做坐得舒服啲。」以滙控近年維持在每股0.51美元﹙約3.978元﹚的派息計，股價要回落至大約57元，才有7厘股息回報率。

至於萬一經濟轉差，拖累滙控盈利表現，集團派息會否滅少？植耀輝直言︰「有少少擔心，但應該派到。」而蘇沛豐則指，雖然滙控為應對貿易戰大幅提高撥備，但未必反映管理層認為業務風險大增，「佢哋撥備一向做得比較足，資本充足率亦普遍比其他銀行高，相信只要唔係金融危機或者經濟差得好緊要，業務都足以支持派息。」