【溫多娜手記】寶貝女牛一　葉茂林揀咗件窩心禮物　你同我都啱！

上回講到，葉茂林次女葉頴恩「回歸」耀才（1428）做主席助理，旋即搞咗場迪士尼Halloween同樂日，讓全體逾300名員工提前感受下萬聖節氣氛，公司上下樂也融融。

事隔無耐，耀才又「開P」！原來，今日係葉頴恩嘅「牛一」，全體員工日前就率先幫太子女搞咗個溫馨又隆重嘅生日派對，有埋汽球花籃同精製生日卡，心思十足。

不過，大家最關心當然係葉茂林送咩畀寶貝女。答案話易唔易，話難唔難！葉生勤力就係人都知，估唔到佢連揀禮物都「貫徹始終」，就係一幅「成功須苦幹」的字畫，希望借機勉勵寶貝女須堅毅不屈、鍥而不捨地朝著目標進發。

的確，「成功須苦幹」呢句嘢出自葉生把口，又真係幾有說服力。溫多娜出道淺，但睇返舊訪問，白手興家嘅葉茂林，年少時以小販擺賣為生，買賣成衣出口配額賺第一桶金，創立耀才證券後，事事親力親為。所以，佢仲同阿女講，即使有父母開路，但亦不應以「父幹」態度去面對人生，做人必須要堅持「苦幹」，累積無數汗水和心血才能摘取甘甜的成果。葉生，阿女聽到你循循善誘，仲唔心到甜埋咩！