【親子共讀】在職媽媽的共鳴《媽媽上班的時候會想我嗎？》

【文章原刊於01撐場，歡迎下載香港01 app，與星級作者一同討論喜愛話題。】

撰文：wagyubmami 和牛媽媽

分享一本在職媽媽超有共鳴嘅圖書《媽媽上班的時候會想我嗎？》，和牛B聽過故事之後，佢就好鍾意呢本書，每晚都會叫我又或者牛爸講畀佢聽。

呢本書係韓國作者金永鎮嘅作品，睇完我真係好有共鳴、好感觸、好感慨。

我感慨嘅係，故事入面嘅媽媽都好似我一樣，會因為趕時間忽略咗和牛B嘅心情，令到和牛B唔開心之餘，自己又會感到好內疚。每日都好想快啲做完工作，盡快放工返屋企見和牛B。

而故事入面嘅小女孩，亦因為媽媽唔了解自己心情而唔開心同時唔識得表達俾媽媽知，所以演變成扭計。

孩子一日一咁成長，係媽媽最大嘅滿足。媽媽亦係孩子最大嘅支柱，而孩子與媽媽，係彼此相互支持嘅力量。

而呢本書絕對係在職爸媽最好嘅親子共讀圖書，一來可讓小朋友知道其實爸媽返工嘅時候，好似故事書入面嘅媽媽一樣，會掛住小朋友，而作為父母就要多從小朋友角度去了解佢哋嘅心情。

香港公共圖書館都有得借㗎，大家可以去借閱或者買返屋企收藏。最後，因為和牛B實在太鍾意呢本書，所以我哋都買咗一本返屋企啦。

【編按：文章標題為編輯所擬，原題為「【親子共讀】在職媽媽共鳴童書系列 - 《媽媽上班的時候會想我嗎？》」】

（文章純屬作者意見，不代表香港01立場。）