【育兒心得】幼兒必經之路：戒片階段，戒片KO！

【文章原刊於01撐場，歡迎下載香港01 app，與星級作者一同討論喜愛話題。】

撰文：wagyubmami 和牛媽媽

幼兒到達兩歲嘅時候，父母就會好心急想快啲幫BB戒甩尿片。
其實戒片，都係幫BB脫離幼兒時期最重要嘅一環。

坊間有唔少戒片方法，但對於我嚟講其實沒有特定嘅最佳方法，因為每個小朋友發展、性格都唔同，無一種特定方法可以對應到所有小朋友嘅。

無得急，無得迫，唔好令佢對於戒片係一件反感嘅事，我哋只有配合佢哋成長而做好準備。

我哋喺和牛B大概兩歲4個月嘅時候，開始進行在家唔着尿片嘅訓練。日間喺屋企戒片，我諗我哋大概開始咗兩至三日，佢就學識咗。
喺戒片初期，喺屋企日常活動，我哋唔着片，大概每30分鐘問佢或提佢去廁所。
如果唔問／唔提佢哋就會好可能，因為掛住玩而唔記得咗去廁所。
就算而家，我哋都會間唔中提下佢。不過，佢基本上已經懂得自己知道急就會去廁所，除非掛住玩唔記得咗。

而戒片我認為最重要就係提示佢哋去廁所，習慣呢一個模式。
習慣咗之後，佢哋仲會自己拎定紙巾，幫自己清潔。

和牛B而家2歲11個月，俾佢適應咗一段時間唔著片，我哋外出已經可以唔著片，唯獨是午睡及夜晚瞓覺都會着尿片嘅。

其實最初期，佢哋仲未識得分咩係急，通常都會尿濕褲子又或者一地都係尿，都係好正常。家長唯有辛苦少少，洗多幾條褲、拖多幾次地。但對於每個小朋友，尿濕褲子嘅反應都好唔同，有啲小朋友一啲反應都無，有啲會覺得好驚，有啲就會覺得好污糟好怕。至於戒片最好係咩時候呢？我覺得係夏天最好嘅時候，因為冬天着嘅衫褲或會比較多，若然尿濕褲仔，要換褲／洗Pat Pat都會怕小朋友凍親以及比較煩嘅。
 

戒片必備：小童便廁
幼兒初期學習戒片，呢款便廁較為方便幼兒自行去廁所，亦方便清潔。
 

【總結】
而家去到最後一步，外出戒片階段，我最傷腦筋嘅就係商場未必有兒童廁又或者超長嘅排隊人龍。所以初期戒片，我都會袋一兩塊尿片喺身，當然唔少得多一套衣物啦。

如果成功出街都戒埋片，亦即係話，媽咪終於可以擺脫大大個走佬背囊了。

【編按：文章題目為編輯所擬，原題為「【育兒心得】幼兒必經之路。戒片階段。戒片KO!」】

（文章純屬作者意見，不代表香港01立場。）