【親子齊做蘿蔔糕】做個賀年小廚師 學整零失敗蘿蔔糕
一踏入農曆新年月份，就會見到好多朋友仔分享佢地嘅自家制賀年糕點，一見到佢地嘅作品，總係令我都好好想試下自己整，但老公一聽到就會話：唔好整啦…買仲方便又好食！（聽到佢咁講真係好想樁佢幾下，咩心情都冇晒啦）
【作者及攝影為小小豬媽媽】
不過今日終於可以一試自己親手製作賀年糕點嘅滋味，謝謝奇華邀請我地參加蘿蔔糕工作坊，原來整糕都係一件好簡單嘅事，就連小朋友都可以做到呀！其實小小豬一向都有同我齊齊整嘢食，所以當佢知道可以嚟整親子班時，佢都不知幾興奮，仲不停問究竟蘿蔔糕係點整？會唔會好難整？要用啲咩材料？要整幾耐？總之又係嚟問題少豬上身般。不過….佢肯問就即係代表佢好期待啦~
係我地開始之前，就當然乖乖聽聽導師為我地示範，導師真係好詳細又有耐性，依個問題少豬不停問，佢就慢慢咁講解，真係超專業呀~
睇完導師示範，就當然到我地動手做啦！首先就將啲臘腸臘肉切粒粒，導師都好貼心，為小朋友準備左剪刀，咁就可以有得參與之餘，又可以顧及安全。將啲臘腸及臘肉切好之後，就可以加埋啲蝦米一齊，然後水波爐焗5分鐘~
依個時候就要將蘿蔔切成片狀，揸刀其實我都唔太想俾小小豬做（因為佢又真係超級論盡的人嚟），不過佢又主動話會小心慢慢咁去切，加上我亦都要學懂適當時候放手俾佢試，所以就….係我視線範圍安全情況下俾佢試一試啦~
係等嘅時候導師仲即場示範整黃金馬碲糕，見師傳三兩下手腳就完成，好似好易咁，攪到我都心思思想整埋一份呀~
說時遲那時快，小小豬牌嘅蘿蔔糕出爐啦(睇個樣都幾OK呀) 。睇見自己個完成品，小小豬都不知幾有興奮，不停話自己好叻可以學識整蘿蔔糕~
開開心心就過左一個又好玩又學到嘢，最重要係睇見個完成品真係勁有滿足感呀！今次都真係要俾個叻小小豬，因為佢做得比我仲要多，基本上可以話大部分都係佢自己整，又冇乜論盡事發生，所以都好叻仔啦！
當然，我地返到屋企就有個小朋友急不及待要食自己嘅蘿蔔糕，咁見佢咁乖就即刻煎嚟獎勵下佢。
往年叫佢食蘿蔔糕，都好勉強咁食半件。但…….今次因為自己整關係，竟然大讚好食，一個人食左半碟，仲叫我快啲去買材料再整過，如果唔係新年冇得食。依隻豬都真係…..唔知好嬲定好笑~
經過今次小小豬咁成功整到好味蘿蔔糕，有個愛豬號DADDY就由反對我係屋企整，到依家都叫我快快手買材料再整過。所以依個百厭豬影響力有幾大呀，不過有得再整我又唔介意呀…哈哈哈！
小小豬Kinsey
全職傻媽與傻豬仔的親子生活， 以小小豬為中心，平日一齊整嘢食又周圍玩 ，讓小小豬擁有一個健康快樂的童年為目標。透過文字、相片及短片記錄小小豬的成長生活傻事及湯水食譜，讓大家可以陪同小小豬一起成長。