【樂評．關淑怡 25 演唱會】只有自愛，才有人愛

歌者哭成淚人，聽眾同樣深受感動，一邊聽歌一邊諗，一個滿有天賦的歌手，因為各種天時地利人和的關係，星途際遇未如理想，甚至個人生活都係波折重重，恍恍惚惚走到呢一段路，或者真係要靠觀眾提醒歌者，自己仍然未老。

近日，一下子好多「前輩級」歌手出來舉行演唱會，繼有陳慧嫻、林憶蓮，最近仲有關淑怡，3 位都係那些年獨當一面的 diva。不過同人唔同命，就算作為「入行 25 周年」慶祝活動，都只開得一場，頭場尾場一 take 過，可惜票房仍然慘淡。連個中文名都怪怪哋，「關淑怡 25 演唱會」，英文「The Best of Shirley Kwan 25 Live」反而合理少少。臨近開騷，割價飛通街賣，難免令人唏噓感慨。

講真，事前完全冇打算會入場。一來本身無聽開佢啲歌，二來多年來在傳媒投射下，聽到「關淑怡」3 個字，主要聯想都係「神化」、「神化」同「神化」。加上佢自己都唔爭氣，近年上音樂節目，以至網絡流傳的演出片段，水準都係非常參差。不過，基於一種「經典歌手走下一個又一個，依家唔睇，隨時再冇機會」的諗法，最後都係決定搏一鋪買飛入場！

製作落足心機　水準起伏不定

紅館睇騷，遲開場基本上就好似例牌的，八點三坐喺度，個心都係涼浸浸：「咁多平飛都填唔晒？真係差到一場都坐唔滿？」

去到八點九左右，疏疏落落仲有少少吉位，整體總算坐滿九成。不過就出現另一個問題：點解八點九都仲有閒情睇空位？事關主角一直都未出場，甚至 band 都未上台，百無聊賴的觀眾開始唔耐煩，厚道少少的就拍下手，更多人就用自己的方式「鼓勵」盡快開騷。

等了又等，九點前後，音樂終於響起，係《繾綣星光下》的前奏，即刻勾起唔少人的回憶，亦換來一陣熱烈的掌聲，始終每位成功歌手都有一批「必殺」作品，於是現場的躁動，一下子平復唔少。

當時我的心情仲係非常緊張：「唔知佢把聲會點呢？」正式入歌，係《一切也願意》，可以話係不過不失，雖然未至繞樑三日，不過係「期望問題」，冇咩嚴重失誤已經好感恩。

之後一直唱一直唱，無論係一首歌的開頭同收尾，以至唔同歌曲之間，水準無疑係有起伏。甚至好好哋唱完一首，可能落一落台、過一過場，下首又有少少問題，不過整體上絕對係漸入佳境。其他技術層面，雖然製作預算只係夠做一場，但係明顯仍然落足心機，特別係服裝同燈光兩個範疇，絕無出現將貨就價情況。

愈唱愈投入　感受歌者對演出的執著

開宗明義叫得「入行 25 周年」個唱，加上近年咁多負面消息纏身，原本以為當事人可能會有一噸苦水慢慢吐，點知完全冇。由九點開場，唔計同嘉賓坤哥吳業坤合唱時閒聊幾句（係囉，唔知點解請坤哥，都冇咩需要深究，至少大家都唱得幾好），關淑怡都係一直唱一直唱，專心一志用作品同大家分享呢 25 年走過的路。

連唱十幾首歌之後，可能係熱夠身，又可能係感受到觀眾的支持，真正的關淑怡終於出現（唔係「神神化化唔練歌」嗰個），獨特的聲線、對音樂的駕馭，以至對演出的執著（包括多次叫停樂隊，要求重唱）等等，加加埋埋，結合成為一個整體，唱出一首一首關淑怡的歌：「人在冷風中，哭過也恨過，只想這是一場夢，夢醒掠過」（《一首獨唱的歌》）、「人生路，有知心一起共勉，伴我一起闖，不再寂寞了」（《人生可有知己》）。

歌者哭成淚人，聽眾同樣深受感動，一邊聽歌一邊諗，一個滿有天賦的歌手，因為各種天時地利人和的關係，星途際遇未如理想，甚至個人生活都係波折重重，恍恍惚惚走到呢一段路，或者真係要靠觀眾提醒歌者，自己仍然未老。所以當唱到《青春常駐》時，關淑怡更加係喊到收唔到聲，其時全場一齊拍和：「祈求舊人萬歲，舊情萬歲，別隨便老去」。時光的確好壞，亦都好冷酷，不過可以肯定，當時大家都想慢些離場，甚至唔想離場。

睇完呢個演唱會，不但再次認識番一批好歌，更重要係，睇到一個人憑着努力同堅持，先自己慢慢振作，然後逐步感動他人。「關淑怡 25 演唱會」未必係技術上最優秀的演出，但會係心靈上好鼓舞的一個故事。

（本文純屬作者意見，不代表香港01立場。）