【菠蘿包有菠蘿】美設計師超現實食字改圖夠妙趣　你睇明幾多張？

「菠蘿包無菠蘿」、「龜包無龜」（但龜苓膏係可以有）、「太陽餅無太陽」、「老婆餅無老婆」、「鮑魚刷無鮑魚」……隨便一數，我們香港人日常生活中就有好多「貨不對名」的例子。食物和日用品名字源頭自有因由，一係就外型似某些事物，一係就有典故。
但看倌不妨發揮小宇宙，想像下假如菠蘿包有菠蘿、龜包有龜、太陽餅有太陽、老婆餅有老婆、鮑魚刷真係成隻鮑魚畀你，佢哋個樣會係點？奇幻？騎呢？恐怖？超現實？美國平面設計師Randy Lewis就玩畀你睇。Lewis來自美國加州，是一位創作總監，他主要接的Job都是商標設計之類的工作，雖然有創意又靚，但仍算是正正常常、穩穩陣陣。他個人Facebook和Instagram就真真正正稱得上天馬利空兼夾離經叛道。
無他，Lewis似乎是用Photoshop等修圖軟件，將一件件日常事物、食物與不同的動植物嵌合埋一齊，製作出好多隻妙趣橫生又色彩繽紛的嵌合獸「蓋美拉」（Chimera）。雖然令人頭昏腦漲的核突嘢（好似本文封面的「牙膏鼻涕蟲」）都唔少，但成組系列大體上既超現實又跳脫鬼馬，真係要講句：「真好玩！」
他的P圖作品看似「九唔搭八」，但其實內藏幽默，甚至有點像燈謎啞謎。某物品的外形同色澤跟外觀相似的動植物好夾，好像麥當勞薯條盒裝住黃色蠟筆、羊頭生在椰菜花（驟眼望落似足白色羊毛）身上等等，在他高班的改圖技巧下都吻合得天衣無縫，「違和君」完全失蹤，不禁令人頭腦混亂，亂過瀨尿蝦撈埋牛丸。另一種改圖更抵死，大玩食字Gag。因為好多英文名詞都是由兩個或以上名詞組合而成，好似西瓜 Watermelon、水母 Jellyfish同蝴蝶 Butterfly咁樣樣，Lewis就「照名執相」咁執出「水瓜」、「啫喱魚」同「牛油蠅」出來。隻隻「跟足字面意思」的神奇幻獸應「名」而生，真係菠蘿包都有菠蘿。出嚟效果有幾好笑，都係等看倌自行參看吧。