【奢華日常】阿媽，唔好鬧住，我無攞錯你個保鮮袋出街……

自從街頭時尚異軍突起後，一眾奢華品牌亦不敢怠慢，將日用品變潮物，由舊年Supreme磚頭到最新鮮熱辣Tiffany & Co.紙杯，都成為城中熱話。
當有人仍在討論Balenciaga宜家袋係咪物非所值時，其他品牌一於少理，繼續向這方面進發，將阿媽買餸煮飯日常用袋，轉化成時尚產品。
新近就有以下三個品牌Helmut Lang、Celine和N Hoolywood的貴價日常袋，問我值唔值？朋友，時尚潮流一向唔係講值唔值，威唔威先係重點。

Helmut Lang保溫袋
價錢：美金$320（大）、美金$295（細）
有唔少人覺得Balenciaga宜家係搵笨之作，假如他們看到Helmut Lang這個銀色保溫袋，肯定會轉軚改口指責目標。自從品牌請來紐約街牌Hood By Air主腦Shayne Oliver擔任創意總監後，風格愈見街頭，今年8月時已推出看似垃圾袋的Trash Bag，至少仍採用皮革，今次Freezer Bag卻只是Polyster製品，不過論「爆」，當然Freezer Bag完勝，銀色外貌跟一般保溫袋無異，分別在於手抽位置印上品牌名稱，而Helmut Lang的IG宣傳照也放進雪櫃內自嘲一番。好彩中秋節已過，否則一個唔小心，畀阿媽用來裝冰皮月餅作送禮之用，就唔知點開口同親戚攞翻。

Celine透明袋
價錢：待定
這陣子有關Celine的消息都是集中於Phoebe Philo離開的傳聞，雖然暫時仍未有最後答案，但已有不少媒體翻炒過去Celine經典，當然Phoebe Philo設計過多款風靡萬千女生（甚至男生）的IT Bag，但為2018年春夏所設計的新袋，就投向玩味設計懷抱，來一個透明手挽袋，雖然呢招COMME des GARCONS曾經用過，但CDG那款尚算是Tote Bag設計，但Celine的卻是跟日常背心袋一模一樣，玩得更大膽更徹底。有人會認為這樣設計或者可以較平一點價錢來入手Celine手袋，有這想法實在太太太樂觀和天真了，事關有消息指這設計除了透明袋外，還要一拼買埋袋中的另外兩個皮袋，呢個世界真係天外有天，袋中有袋，唯有自我安慰，買一個透明袋，加送Pouch和Wallet，買一得三，已經賺咗。

回帶：
【IKEA購物袋】Balenciaga又中槍 美國街牌IKEA購物「帽」抽上抽

N Hoolywood垃圾袋
價錢：27,000日元（有圖案）、18,360日元（黑色）
雖然日牌N Hoolywood唔算係奢華品牌，同時跟袋品牌吉田Porter亦多次合作，但今次一反傳統，不是向軍事風格取經，也不是推出常見的背囊、頭盔袋或腰包，而是一款望落似垃圾袋的索繩設計，如果有日落街無乜點配襯或過份Vintage風的話，好容易被誤作成拾荒者看待，其實，我係唔係應該讚N Hoolywood夠傳神？