【有片】冰島小鎮出現「離地」斑馬線　係秘密磁浮科技？

冰島這北歐島國，冰多，魚多，好音樂都超級多；原來斑馬線都好好玩。
最近冰島某條街馬路出現了一條懸浮喺半空中嘅斑馬線，究竟係咩高科技？

正所謂「一百歲唔死都有新聞」，世界上無乜嘢係不可思議，只存在可能存在之物，只發生可能發生之事。就好似冰島西峽灣小漁港伊薩菲厄澤（Ísafjörður）的馬路，一條斑馬線離開地面，浮起懸空。

正當你唔知行人點過馬路之際，上網睇片卻見到當地居民掂行掂過，頓悟到原來自己被戲弄了—— 那只是一條普通斑馬線，只是以3D立體地畫的二次透視繪法，把傳統白色斑馬線變成半天吊的離地白色立方體。用白色和三隻不同深淺的灰色加上高超透視技巧都做到如此以假亂真的視線錯覺，令人佩服。

這條離地斑馬線是該鎮馬路翻新工程的一部份，有藝術感、有創意之餘亦都希望藉此減低馬路車輛（尤其是電單車）車速，畢竟係司機見到條線浮起都會不其然慢駛起來觀察。

促成者是冰島環保署官員Ralf Trylla，他曾於印度新德里見過相似的工程，就此效法，聘請油路公司Vegmálun GÍH設計並實行。據說中國同俄羅斯都有地方咁油斑馬線，下次揸車見到，唔使驚以為見鬼了。