【Chok爆】網絡紅人Salt Bae推Figure　還原招牌式蘭花手灑鹽

今日唔知聽日事，在資訊爆炸時代，任何星斗市民一個唔覺意隨時都會變成紅星，都唔知好嬲好笑定恐怖。就好似今年榮登互聯網「一月之星」土耳其大廚兼烤肉連鎖餐廳老闆的Nusret Gökçe，因為將自己浮誇作狀之極的切肉同「蘭花手」灑鹽動作的料理片段擺上Instagram，被瘋傳成為一時住話，更有了「Salt Bae」這個國際知名的花朵。
Nusret Gökçe「膠力」十足，而他刀功無疑出神入化，兼之玩得興起，至今仍在個人平台不停上載充滿多餘動作同矯揉造手的chok爆煮餸片，正是煮飯都要「孔雀開屏」。有關Salt Bae的網絡Memes和二創多到數唔曬，在此不贅。
可能你會鬧Salt Bae搏上位，他無疑是，還嫌做得不夠出位，更越來越「煩膠」；但成功用自己做生招牌為餐廳宣傳做勢。所謂「Don't argue with success」，你又真係奈佢唔何。

女生都喜歡識烹飪、愛烹飪的男生。身形健壯紮實、外表像意大利西西里島人的土耳其大廚「Salt Bae」Nusret Gökçe近半年來的風頭唔係講笑，他的精準切肉刀功同埋標牌的「意式」「蘭花手」矯揉落鹽法誇張得來充滿喜劇感，看其動靜還以為是星爺拍緊《食神》第二集 。

由原型師「小川徹宗」主理的日本模型玩具公司Audace最近發表了以Salt Bae為原型的Figure「オッサン4～焼き鳥は塩～」（老人4 ～鹽燒雞肉串～），作為「老人系列」（オッサン）的第四彈，比例為1/20。

在小川的妙手雕功下，Salt Bae的太陽眼鏡、鼓起的胸肌以及那讓人又愛又恨又覺姣的灑鹽蘭花手都得到百份百還原，還有穆斯林彎刀、衫褲上的摺痕等細節都非常可觀。

其實除了Salt Bae這位花俏到煮飯都要「孔雀開屏」的型佬外，小川徹宗似乎中老年男子情有獨鐘，稱其為「大叔控」都唔會錯得去邊。

由「老人系列」所見，小川頗為擅長製作風格古怪、設定搞笑、造型超現實的中坑和老坑公仔，極富諷刺意味。像第一彈為貌似Daniel Craig飾演之占士邦的老人，小川把這位老人的背景設定為擅長勾引人妻的紳士型上班族。第三彈為「日本的盟友」（日本の味方），原型是鹹蛋超人，但係頭套取低咗，露出日本首相安倍晉三的真樣。

不過講到老人系統中最抵死過癮就一定是第二彈「勝負事の最強御守」，一名貌似美國總統侵侵的美國相撲手，。可惜的是老人系統的所有Figure（包括Salt Bae）都在預訂階段時售罄。有興趣玩的玩具朋友，或者要哺住品牌Audace的官網、以及小川徹宗的Twitter和部落格，獲得任何舊辨再出或騎呢新品的新消息。