【唔靠父幹】如何月入15k變100k？　過來人：唔好同公司講「心」

相信無乜人會唔同意：人生在世，「打工」其實都係為咗過好生活，起碼可以養活自己，甚至成家立室，報答父母等等。
當然，對工作內容的興趣都係重要一部分，但相信對絕大部分人而言，工作的一大部分Motivation，正正就係搵食，因此「人工」佔頗大比重。
而無論你承認與否，你的收入高低好大程度亦Define了你自身的價值，無論係你自己的自信心以及他人眼中的你。同一個人，月入15k時同後來月入十萬，成個「氣場」都唔同晒。

尤其係打工而言，你所身處的行業與公司，對你收入高低起碼佔了一半的影響，而呢個亦係SJ收集各行各業人工資訊的作用：同一個人，身處一份好工定係伏工的分別，對其收入及快樂指數等一樣差天共地。

然而，另一半的影響，就在閣下本身。你想月入十萬，但首先個問題，係你配唔配月入十萬？

以下係SJ認識一位過來人的心得，短短幾年間，成功由他所屬的行業的最底層，在無任何既有人脈及家底下，爬升至Fast Track晉升風口位置，三十歲不到已經月入十萬，遠遠超越當初同一起跑線的同事，雖然並非已經發達或已經創造甚麼驚天動地的事業，但以本身平平無奇的人生來說，其實已經頗為傳奇。這位朋友分享的心得如下：

1、踏出Comfort Zone

第一步，正正就係踏出Comfort Zone，哪怕看似係吃力不討好的小事。無論你身處咩行業，無論你公司大定細，好多時都有一些演講，Presentation等的機會，而亦正正就係踏出Comfort Zone的機會。

當你身邊的人日復日，年復年都係做「分內事」時，你自願甚至係爭取一些自己鍛鍊及Exposure機會，尤其係Public Speaking相關的，其實已經係你同其餘的平庸大眾的分野的開端。

相關文章圖輯：【搵工】初心已逝辭職為最後答案？　10件事決心離職前該認真考慮（點擊下圖看清！）

2、唔好有「依靠」公司的錯覺

SJ呢位朋友表示，當年有一位猛人前輩一番話啓蒙了他：唔可以有「依靠」公司的錯覺，公司無欠你任何嘢，亦無義務幫你成功，要成功升職加薪，要令公司有「必要」加你升你，而重點始終係你自己實力。

對絕大部分公司來講，你就係人力資源（Human Resources）而已，每月比15k你，你應該幫公司賺30k，假如比得10萬你，你最好幫公司賺最少20萬。本質上，你同機器資源無分別。假如你有幸入了好公司，跟了好老闆，公司願意栽培你亦關心你長遠發展，呢個簡直可以話係非常幸運。

但絕大部分情況，你公司及老闆完全對你的前途發展沒有任何興趣，亦話知你人生有咩需要（讀書進修／成家立室／結婚買樓／供養父母等等），總之盡量壓你價，理得你，最好一世都踩住你唔比你上位。依啲情況，唯一就係增加自己價值，逼令公司必須加你人工，而否則你亦可以另謀高就。

3、立志成為最Top

承上題，要增加自己價值，最直接就係自己個人要立志成為行業翹楚，自己要變成Somebody一個了不起令人敬佩的人物，令自己對公司而言係Indispensable不能替代的。

你不強大，再多人脈都係虛無飄渺的。要係職場有尊嚴地立足，甚至希望月入十萬，必須努力令自己實力足以成為行業頂尖精英，最好亦係一些大家有目共睹而可量化的成績。

而呢個社會亦越來越有呢個現象：80／20變為99／1，即1%人賺了99%的錢。呢個全球一體化年代，「中間」甚至「中上」已經無乜空間，而變為贏家通吃winner takes all的局面。就一件事，或一個事業，假如你做得厲害，而且在行內出埋名，錢係追住你等你賺。相反，假如你做一段時間都不甚了了，即使你願意減價，一樣無人問津。而呢個亦解釋到Headhunt行業的存在：基本上獵頭公司都係找那些高收入人士高薪挖角過檔，但對中下游的則往往興趣不大。越高收入的人，越係大家爭住想請，而無需好似你同我咁要寫Cover Letter去「求」職求Interview，反而係調轉，Headhunt公司求個Candidate去見工。

4、創意： Think outside the box敢想敢做

呢個年代，個個都識講Think outside the box，但唔係幾多人真係做到。即使係打工，你有否利用科技來改善你的工作，而其他同事無做到的？當然，更進階的，就係學寫Programme甚至用依啲自製Programme來令自己工作更有效率，呢個分分鐘係另一個超級Startup的開端。科技以外，你有否做到出其不意呢？

孫子兵法都講「凡戰者，以正合，以奇勝。」打仗必須出正規軍同敵人會師，但往往贏出，係靠另外一隊出其不意的奇兵，突襲制勝。職場上都係一樣，老闆交給你的分內事做好，就係「以正合」，而工作分內事以外，當大家返工放工食Lunch時，你能否額外對公司甚至行業有更大貢獻？呢個就係 「以奇勝」了。

相關文章圖輯：【搵工】轉工加人工怎連薪俸稅都加？　留意加薪跳槽5大盲點（點擊下圖看清！）

一位前Goldman Sachs banker，亦在其自傳《Why I left Goldman Sachs》中，講述自己仲係一個小人物Analyst時，每日自發將行業及公司動向以表列形式列出撮要，並發布予全個Department。雖然呢個並非咩驚天動地之作，但好多資深的Associates、VP、甚至Directors等依靠呢份「Cheat sheet」可以非常有效率地對Client作出匯報，幫左團隊唔少忙，亦令到公司上下唔少人因此對他有好印象，而不久後順利升職加人工。呢個其實唔單止係Think outside the box，亦係Go the extra mile。

題外話：喺香港，成日聽到人講「Think out of the box」，每次都覺得怪怪哋，但又唔敢肯定呢個講法係錯，有否英文高手解答下？假如Uncle Siu路過都不妨解答下。

5、要有「做大事」的心態 願意犧牲

大部份行業與工作都一樣，當你月入四萬以上，你的工作壓力與責任，會比從前大十倍以上，公司同客戶都期望你係24／7要隨時候命。呢個時候，可能你必須犧牲唔少嘢，例如興趣，同朋友吹水時間等等。係咪值得就另一回事，但肯定係必須有呢種做大事心態，先有可能月入十萬，

6、堅持：堅信努力最終有回報

即使你做齊以上1-5項，都唔保證你會好快人工升到一個你滿意水平。反而，當你做咁多嘢，更容易有種迷失，自己做咁多嘢為乜？你走去自告奮勇做Presentation，對住成百個行家，又要準備Powerpoint同講稿又盛，又無錢收又佔用你僅餘休息時間，真係可謂貼錢買難受。

而且，到頭來人工都係咁，咁倒不如Hea做算。或許堅持正正就係最困難的，假如你放棄了，咁人生事業就係咁大。但你一直堅持付出，始終有一日你會有回報，問題係幾時有回報，呢個無人知，亦有際遇成分。

但可以肯定的是，大量付出係必須的。咁在無保證回報情況下，你又肯唔肯堅持繼續付出？起碼，以SJ親身觀察，雖然回報期長短個個都唔同，但其實只要有大量付出，多數都最終有重大回報。

「我都有勇氣　尚存一顆心
這種高貴尚未曾脫軌
我更要信　未爬的天梯
會不久以後一一發現
在這俗世」

SJ結語

其實只需努力做，你都做得到。年輕人，無論生活與工作如何磨滅意志，一齊停止找藉口，立即尋回鬥志吧！

【原文轉載自StealJobs.com。StealJobs全面透露各行各業人工，工時，晉升前景，以及入行攻略，歡迎匿名提供收入資料。】