【物以類聚】識人好過識字　友誼點先長存？　睇下係咪同一層次…

對於交友，有人認為識人好過識字而以量取勝，穿梭各種朋友（及朋友的朋友）的聚會，像散彈槍一樣交換FB/IG 與約食飯；亦有人認為朋友貴精不貴多，友誼重質不重量。

無論你相信與否，人人生而不平等，而往後的成長差異越見巨大。所謂物以類聚，人以群分。

唔同層次的人，基於緣分或堅持，一樣可以玩埋一齊，但更大的問題係有無必要玩埋一齊。

之前美國就有單新聞，講個法官審理一單刑事案件時，猛然發現案底累累的被告，原來是自己的小學同學。曾經鄰座的同窗，讀一樣的書，返一樣的學校，十幾二十年過去，社會地位竟然有著如此巨大差異。

在香港社會，呢種例子亦比比皆是。

例如，（曾經的）傳媒大亨肥佬黎，據說早年在街頭開檔做小販，常與街童及流氓打交道，惟因少年肥佬黎非常上進，經常一邊開檔一邊睇英文書，江湖地痞見狀也對其特別手鬆，保護費都收少D。幾十年過去，那些曾經和他一起混跡街頭的小販與街童，如今又在哪裡？相信即使唔係經常進出監獄，生活亦頗為潦倒。

曾經的朋友，又能否抵抗年月的沖洗？ 其中一個重要因素，就係你們是否在同一層次。

雖然有D人天生特別醒目，或者特別識搞笑，亦有D特別讀到書，當然都要好多平平無奇的人，但每個人都係自己人生的主角，而每人的「人生之旅」，其實都隨命運與自身的選擇，一步一步走出來。

假如你選擇了「發奮」與「上進」，努力工作之餘不忘進修，唔敢指望咩出人頭地，但起碼要對自己與家人負責，但混在一起的身邊人，卻終日沉迷打機同飲酒飲到爛醉；當你研究巴菲特的價值投資其中的智慧，身邊人卻告訴你賭波買咩波膽賠率最值博並遊說你賭埋一份。呢種友誼肯定唔Sustainable。

同理地，大部分人其實都希望同更優秀的人做朋友，以及「玩埋一齊」，當然有些想抄捷徑的人更視之為搵著數或上位的方法，希望富二代朋友有好嘢預自己一份。起碼以前者為例，你揀人時人亦揀你，始終客觀條件不能差太遠，否則對方亦難以認許你為有趣的朋友。

關於「朋友」，古往今來有好多充滿智慧的解讀：

三人行，必有我師

發上等願，結中等緣，享下等福

You will move in the direction of the people that you associate with, and you want to associate with people who are the kind of person you’d like to be.

其中，尤其巴菲特（Warren Buffett）重視「投資朋友」的重要性，因為近朱者赤近墨者黑，每日你同身邊的朋友其實都慢慢地互相影響，長遠計水滴石穿，複合起來的影響力極為巨大。

擇友時，係咪一定要搵條件優秀的人？其實亦唔一定，更重要的，是對方是否有：

1) 良好品格及正面價值觀
2) 本身的能力以及渴求個人成長

一段優質的友誼，係你地可以有「Intellectual Conversation」講人生講事業，甚至天文地理無所不談而志趣相投，亦可以講無聊嘢都大笑一餐。當然，兩者皆中的可能性其實更微乎其微，如果二者中一其實已經係難得的好朋友了。

正如上面講到的「結中等緣」，交友但求找自己層次相約的就好了，不用強求攀附權貴。而係咪一定要Discriminatory地去DQ 「唔合格」的身邊人？ 當然亦唔係，如果係有共同經歷的好朋友，嘗試欣賞他的一些優點，尋找其值得學習的地方。假如確實差太遠的，確實亦好可能會慢慢自然流失。

畢竟，擇友如人生好多事，其實好難拿捏。在「順其自然」與「攻心計」之間，有大量的留白，留待你自行發揮。

友誼的光輝，夾雜著以上看似比較勢利的考慮，但亦有許多無聊笑話的歡笑，甚至係老朋友的一笑泯恩仇。

Bottom line大概係，就算唔係同一層次，起碼要令覺得Comfortable，互相支持與欣賞，咁就肯定可以繼續做好朋友。

【原文轉載自StealJobs.com。StealJobs全面透露各行各業人工，工時，晉升前景，以及入行攻略，歡迎匿名提供收入資料。】