【唔講唔覺】散仔變中產的8大特徵　考慮結婚、學買股票都算係？

雖然話香港生活艱難，大學畢業後都難免經歷一段無奈與挫敗時期，但部分比較幸運或努力的人，總能在大概28至32歲之間，一洗剛畢業做「散仔」人工低＋工時長的頹氣，在事業上從捱打舉步維艱的開局，終於慢慢立足企穩陣腳，繼而昂首邁向頗為Well-to-do的「中產」階層。

SJ團隊綜合了不少人由「散仔」邁向「中產」的8個特徵，睇下大家或身邊人有否類似經歷：

1. 　唔少物質上的第一次

「中產」會經歷更多物質上的第一次：

即使年齡漸長，成日自覺好老，而且身不由己，但充裕的物質卻彷彿是最好的Remedy……？像陳奕迅一首冷門歌《第一個雅皮士》歌詞：

第一套　阿曼尼　從此生活更美麗
第一輛　小奔馳　　從此有了新目的
第一個　雅皮士　從此城市有了傳奇….
第一瓶　勃艮第　從此生活更美麗
第一場　蘇富比　從此有了新目的
第一個　雅皮士　從此城市有了傳奇
早知一切如此　看我會否開始

雖然告別18、22的青春歲月，豐裕的物質卻彷彿是一場美麗人生的新開端。

2. 　收入突破5至7萬

正如紀律部隊的「散仔」人工2萬幾到頂薪4萬左右，而「幫辦」就4萬起跳到7萬左右。假如你在私人市場，人工突破5萬亦係由公司散仔晉升為一個「小經理」的跡象。就算係保險公司如AIA保誠等，近年個個Agent都將自己「MDRT」呢幾隻字寫上卡片，好似驚你唔知佢係Million Dollar Roundtable，據前線Agent口述，實際來講，MDRT資格就係月入4至5萬左右。收入突破5萬，就係其中一個你唔再係散仔的特徵。

當然，假如你以為自己月入6萬就好巴閉？少年你太年輕了。

3. 　運動次數與體能下滑

收入可能往往同運動次數與體能成反比，起碼at the lower end係，即月入1-12萬的打工仔。原因係收入及職位愈高，責任與壓力往往愈大。月入15k的Fresh Grads其中一個有用技能大概係「射波」然後6點即閃人，但當你去到一個小Manager至Senior Manager  級別月入4至12萬左右時，你的「射波」技能未必再好似以前咁好用，因為好多時你本人就係個Project實際負責人，你係會落手落腳做嘢的人裏面最Senior的那一位，當下級做嘢質素未達標時（永遠都唔會達標），你就要負責執屎。

因此，從前日日放工踢足球，慢慢演變為一星期一次，再到一個月一次，通常就係呢個階段。

4. 　個個都結婚（迷之聲：唔通個個都想結婚咩）

呢個可以話係更加Age Specific：邁進30歲左右，個個都結婚，個個都擺酒。尤其係工作比較體面的朋友，個個都四季酒店香格里拉，唔多唔少都有Peer Pressure。當然，呢個都係幸福的煩惱嚟嘅（首先你要有女／男朋友）。

5. 　朋友話題圍繞品味人生

從前對社會不公最憤憤不平的某某，大學讀Social Science，畢業後輾轉做過幾份工，如今做咗AIA「理財顧問」（即Agent），據說月入15萬，仲Show張稅單俾你睇，一年交十幾萬稅。從前FB成日Share揭示社會不公的新聞兼超長評論，而家則清一色「正能量」Post自己同「團隊」如何努力奮鬥，協助客戶爭取財務及保險保障，絕口不評論任何「負能量」新聞。呢個例子可能Extreme少少，但其實呢種價值觀轉變比比皆是，分別係你收入未必有15萬姐。

即使比較貼地例子，無論月入過唔過5萬，身邊的朋友話題開始圍繞：

咁又係，一班人坐埋，唔講食玩買，唔通講民國歷史同地緣政治咩，頂多講下Trump訪華會帶挈邊隻港股。（假如你遇到食玩買以外的知己好友，請好好珍惜）。

6. 　你開始Care 所謂財務策劃，同埋交稅

散仔時期一年交稅可能先一萬幾千甚至更少。當你終於到脫離散仔行列，甚至有幸坐了爆數晉升直升機的話，開始講緊交十萬八萬稅，唔係講笑。你開始研究如何報稅可以畀少d，有咩可以報開支。

除此以外，見到銀行戶口開始有少少閒錢累積，你開始關心咩投資買股票買ETF之類。當然，亦有好多人在呢個時期迷失，瞓身炒股而不務正業。

7. 　開始有種Complacency

唔使講都知道，所謂一朝得志，語無倫次。可能你都會經歷呢一個時期，以為自己好巴閉，在Armani Prive同幾個同樣脫離散仔行列的朋友，齊齊係所謂人生勝利組三十出頭個個月入十萬，一個做Google一個做醫生，最差個都做AO，大家從買樓及裝修開始講起，講到年底去歐洲旅行，甚至笑X那些際遇比較差的舊同學。

雖然有時未必笑得無道理，但一個人的一生，最黑人憎大概係就呢個時期。

8. 　你開始發現：自己何其渺小

有些人的Complacent階段會一直維持，亦有一些人悟性較高，或本身謙虛，明白社會的「天高地厚」，月入十萬其實都係不外如是。反而係以前散仔階段，會對所謂「（較）高收入」有不切實際幻想，當人工升到一個位，才發現其實本質上都係一樣。當然，月入十萬點都好過一萬，但本質上都係賣自己時間同青春而已。即使單純以錢衡量，當你工作30年平均月入10萬，其實退休時不過3,600萬，連中半山3房都未必買得起。

更何況，錢以外，更加重要係你認同自己人生的路向，認同自己工作有意義及真正價值嗎？SJ早前有位醫生朋友這樣說：「外人以為醫生就一定懸壺濟世，妙手仁心，其實不外乎頭痛醫頭，腳痛醫腳。無論內科定外科，公立定名醫，都不過係醫療系統下的前線Operator，睇你有幾Skillful幾快手做好盤數，好微觀。要真正Live up to 懸壺濟世，宏觀地醫好更多人，起碼要做Public Health相關，改善成個醫療系統，甚至係做科研。但邊條路好搵？ 唔使買大坑道同供仔女讀Island School咩。 」

其實，你會開始發現，自己何其渺小，呢個亦係Burnout的高峰期，重新尋找人生路向。

結語

初出發那天　盼由樹　變成路
一醒覺　經已殺出　這條路
人情物理　直行直過
若然後遺未清掃　可否盡掃

太意想不到　一切困境　會平定　變成路
犧牲最寶貴那些　也難料到
然後賺了獎項　又想走回頭　改定數
時候不早了　別等到　情懷老

問我初衷　鏗鏘的答　不吞吐

（原文轉載自StealJobs.com。StealJobs全面透露各行各業人工，工時，晉升前景，以及入行攻略，歡迎匿名提供收入資料。）