特朗普當選同英國脫歐，兩隻黑天鵝係咪一樣？

今次特朗普上台，除咗話你知民調唔準，全球化節節敗退。仲話到畀你知，眾多傳媒、學者、專家真係極其離地。再去自 high 圍爐講「希拉里呢拳打得好」、「希拉里冇得輸」、「選特朗普出嚟會經濟崩潰呀」全無意義，未來四年真係應該諗下，點樣去接觸到啲一路都被忽視嘅民意。

「公關災難」後，「黑天鵝」係近年香港媒體用得最濫嘅一個詞。不過用落英國脫歐公投，或者今次美國大選上，算係恰當。

脫歐同特朗普拎埋一齊講，有人嗤之以鼻，《蘋果日報》嘅盧峯就話咁比係不倫不類、蘋果同橙，兩回事喎。但明明蘋果同橙就一樣都係生果。

而家塵埃落定，不妨睇下呢個蘋果同呢個橙，有咩地方一樣，有咩地方唔同。

相同一：反建制、反全球化、反「經濟發展」、向精英豎中指

呢個係最關鍵嘅一點。

特朗普點解贏？因為民心求變。係真變，唔係奧巴馬嗰種得把口講「Change」嘅變。換個黑人做總統唔係變，換個女人唔係變，甚至換個共和黨總統都唔係變。係要打倒建制，而共和黨、民主黨都係建制。

希拉里有眾多問題，但唔好忘記特朗普唔只贏佢一個，佢仲贏晒共和黨其他人。記住，群眾厭惡嘅唔止係民主黨，而係根本厭惡「兩黨政治」（bipartisan）呢種現狀（status quo）。希拉里即係奧巴馬即係克林頓，但 Jeb Bush 傑布布殊一樣係嗰回事。群眾受夠呢種「圍威喂」你做完到我做，總之有錢齊齊搵嘅轉莊系統。

點解會咁？同脫歐一樣，特朗普上台，多得貧富懸殊。美國經濟政策研究所（EPI）數據顯示，扣除通脹後，1979 至 2013 年間，最頂 5% 嗰班人工升咗 41%，中間嘅只升 6%，最低 10% 嘅嗰班人工就跌咗 5%。咁你話會有乜後果？各種民調話你知，特朗普嘅支持者，好多係覺得而家差過 50 年前嘅人，唔少正係老人，同支持英國脫歐嘅一樣。

2008 年原本係個好機會，窮人以為等到有錢人折墮。點知銀行家花紅照出，冇人坐監。仲要長期低息，啲樓愈嚟愈貴。到今次選舉，卒之要爆。

同香港幾似嘅係，選民覺得，經濟好股票升，關我乜事？我冇着數仲要更難買到樓，仲要睇住啲有樓有股票嘅人富者愈富。移民有助經濟又關我乜事？搶咗我飯碗益咗老闆咋。早排 370 個經濟學家聯名炮轟特朗普，話佢唔識經濟，會搞到衰退。分分鐘咁樣係幫特朗普助選。經濟衰退？好丫，卒之等到你班人仆街了。反正老子仲有最低工資有失業救濟。

相同二：民調、傳媒、專家、金融市場，一次又一次，全部錯到七彩

編輯話我係少數估特朗普當選嘅人，我受之有愧。大把人出嚟講話「我一早話咗」，但冇我份。你吹水講兩句嘅冇理由計，至少你都寫篇文出嚟白紙黑字講。邊個咁把炮？拍紀錄片嘅 Michael Moore 就做到。佢篇文幾個月前已經話特朗普贏，講埋點解，唔怕你恥笑。

首次電視辯論後，我篇博評冇講特朗普會贏，只係叫大家唔好太老定，唔好只信民調、賠率、媒體以及金融市場，結果不幸言中。

話一早估到嘅，多數都係呃你。你睇民調，基本上全部都話希拉里仲領先；甚至有人寫文話「特朗普有機會」只係傳媒搵嘢嚟炒作，美國民調好準，唔同脫歐，玩過咁多次，又計選舉人票，只係普選票追近嘅特朗普根本冇機會。

加埋選舉人票制，根本冇主流傳媒或分析覺得希拉里點有得輸。就選舉之前一晚，路透社（Reuters）話希拉里 90% 贏，紐約時報（New York Times）話 84%，博彩公司開嘅盤口係 1.2 倍左右。

唔信傳媒又點？ FiveThirtyEight 網站嘅 Nate Silver 往績夠晒好，比好多傳媒更有權威，亦都唔敢太老定，但都估希拉里有超過 70% 機會。

信真金白銀億億聲上落嘅金融市場，一樣出事。選舉前嘅周末，聯邦調查局話唔查希拉里，結果歌舞昇平，美股創八個月最大單日升幅，被視為「特朗普探測器」嘅墨西哥披索大反彈──根本就同脫歐前一樣（唔止，出結果當日港股大跌完即日反彈不少，都同脫歐日一樣）。

傳媒認為特朗普口中嘅「隱形選民」冇幾多。結果佢哋唔止存在，仲有大量，而你根本偵測唔到。

唔同之一： 脫歐鬧制度選民 vs 希拉里服輸 （相對地）

上次脫歐公投後，好多傳媒都搵咗啲「唔知自己投乜」嘅選民出嚟笑。包括話 Google 搜尋「歐盟係乜東東」嘅人大增，或者訪問下啲「我諗住投票嚇下歐盟咋」、「我唔知真係會脫到喎，我點知咁大鑊呀」、「我好後悔呀，可唔可以投過」嘅選民。滿足啲知識分子「撐脫歐嗰班正阿毛」嘅想法。

今次相當唔同嘅係，選總統似乎比較簡單，甚至唔使知咩政綱之類。大可以話「我鍾意佢就選佢」，甚至「我憎佢對手，所以選佢」。所以今次選舉後，啲傳媒似乎冇咁易搵到「無知選民」，亦都唔覺有咩投咗特朗普嘅出嚟話好後悔。

至於民主制度嘛，「選舉人票」vs「普選票」邊樣先「公平」，一直大把人討論，呢度唔講。想講嘅係，特朗普拉票時好多人話佢反民主，葉劉淑儀個老師 Larry Diamond 係其中之一。特朗普一度話個選舉過程畀人操控，話內定，但而家選到當然就話個制度全世界最好，美國人民好嘢。希拉里亦都一早認輸，冇走去話唔公平，話選民白痴，叫選舉人唔好跟民意投票之類。

相反，脫歐之後，肥彭彭定康（Chris Patten）寫文狂插，話咁樣去拎一條問題公投極之兒嬉。哈佛嘅 Kenneth Rogoff（此人在金融界極有名望）直頭話得 36% 選民投脫歐就脫，實在係玩俄羅斯輪盤（佢意思應係公投事關重大，冇理由咁低門檻）。

唔同之二： 脫歐留歐各有支持者 vs 特朗普人人得而誅之

呢個係最有趣嘅地方。

脫歐公投中，有報紙支持留歐（Financial Times、Economist、The Independent、The Guardian 等），但亦有唔少支持脫歐（Daily Mail、The Sun、The Daily Telegraph 等）， 算係各有支持者。

但去到美國大選，報紙一面倒支持希拉里。你講唔講得出有邊份美國報紙為特朗普背書（endorse）？答案係只得兩份：Las Vegas Review-Journal 同 Florida Times-Union，聽都未聽過。有三份過去九次大選都為共和黨候選人背書嘅報紙，今次都轉軚背書希拉里。

難怪特朗普覺得傳媒畀人收買。事實係電視辯論期間你亦都見到，傳媒擺明唔鍾意佢，我篇博評有提到：「希拉里篤中對方死穴就係醒目，特朗普篤中就係冇風度嘅爛仔」，傳媒只係想睇佢出醜。每次辯論都係話「希拉里贏」。但又如何？特朗普而家笑到最後，大大隻中指送畀傳媒睇。

今次特朗普上台，除咗話你知民調唔準，全球化節節敗退。仲話到畀你知，眾多傳媒、學者、專家真係極其離地（包括我，但我唔係美國人，當然離美利堅之地好遠）。再去自 high 圍爐講「希拉里呢拳打得好」、「希拉里冇得輸」、「選特朗普出嚟會經濟崩潰呀」全無意義，未來四年真係應該諗下，點樣去接觸到啲一路都被忽視嘅民意。

（本文純屬作者意見，不代表香港01立場。）