【選戰邊緣人】平權之路　水滴石穿　何秀蘭：有經驗跟建制派格劍

由被恥笑至大眾認同　同志平權之路寸進

談何秀蘭於立會多年政績，為人熟識是她致力關注同志平權、兒童特殊學習需要等較小眾的議題，何秀蘭指這或與她的性格有關，「小眾嘢大部分人都唔做，但啲議題確實擺咗喺度，有嘢無人做，咁我會執嚟做」。尤其同志平權議題，她說是在2000年立會選舉前，因緣巧合下接觸，「有個同志組織做咗個聯署畀候選人簽，我以前讀佛教學校，講眾生平權，一聽到平等嘅嘢就好入腦，所以一定簽。咁簽完又選到，咁就要交數」。

其後，她在議會中，將不同有關伴侶、配偶、親屬的法例議案，都提出應包括同性伴侶的修訂，又成立小組委員會，研究性傾向歧視問題，「以前講歧視剩係講捐血、電視廣告嗰啲，但歧視問題係可以拆開好多層面，例如同性伴侶無配偶免稅額、公屋申請權、醫院探視權，到近年發現原來連伴侶骨灰龕都唔畀拎。以前好多人唔覺得有歧視，慢慢開始明白原來歧視唔只係人與人之間，而係政府行政上真係有不相同對待」。

何秀蘭指過程中曾受攻擊和嘲笑，但至今大眾對同志平權議題明顯改觀，「2000年時明光社強烈攻擊，好多人恥笑，但到依家七成人覺得要平等；而議會由以前大多數人反對，到依家工聯會都話要反歧視，我覺得係有成績喎，雖然係耐啲」。家庭暴力條例、電子健康紀錄條例、人口普查令等，逐漸加入適用同性伴侶的修訂，何笑言，這就如她的競選主題，爭取同志平權，就如「水滴石穿」般，得到寸進。

談泛民被批無用：只要團結其實議會有用

除了小眾議題，何秀蘭說自己其實也有關注大眾議題，例如早前「網絡23條」版權條例草案，泛民議員連日拉布下令政府撤回方案，「果次係辛苦但開心，因為聯合到公民社會，又連結到廿多名泛民議員，一齊做政策研究，做好扎實嘅發言，仲要有策略地流會，當時做（飯盒會）召集人真係做到嘔血」。何認為事件證明只要泛民團結，可以於議會發揮很大作用，「當時真係好似一隊波咁打出嚟，證明議會其實有用。如果好似某啲組織只係狂鬧泛民，點團結到咁多人？唔可以單靠衝，然後話其他嚴謹認真嘅發言無用」。

被問到近年社會對泛民議員負面聲音不斷，何秀蘭指「我認為係議會內，與其代公眾去出啖氣，去鬧官員，不如拎更多細節出黎講和問，市民了解更多，自然識得嬲，唔使我代佢哋嬲」。何秀蘭稱自己像「耕田打底」般做好基礎，「要有分工，有人負責解釋件事，有人唔怕行動公民抗命，但當然係有底線果種。今次選舉好關鍵，在於變與亂之間。大家會倒過來情緒化，訴諸肢體衝突，定係相信和平有力量，去做改變」。

「交棒」是最大目標：新人Ready即刻Byebye

今屆選舉工黨繼續由何秀蘭伙拍老將李卓人、張超雄，再帶領新人胡穗珊出戰，何秀蘭指工黨是「穩打穩扎」的政黨，不希望亂推新人，「強推個新人出嚟練兵，分散人哋啲票，可能又連累應該選到嘅人選唔到。我哋希望新人可以有歷練有質素，如果一下子變晒做新人係有風險。」被問到有否想過何時退下火線，何直言「新人一Ready, 即刻Byebye！」，又說工黨最大目標就是「交棒」，「李卓人及張超雄獨立選其實完全無問題，我自己都試過，仲自由自在添。但點解要放棄自由，就係想有系統同彈性去畀新人上。如果自己去搵人接棒，有時可遇不可求，但如果成個黨搵，合適嘅人可以各區調動」。

呼籲支持多兩民主派入議會

談到近日民調勢危，何秀蘭表示，心情像坐過山車般，但認為數據未必得完全作準，「如果到最後得1%（支持度），街站反應又係得1%，咁就不如呼籲佢哋歸隊算喇！但依家街站反應其實係好嘅」。但何指於近日拉票活動時也有不同做法，「港島區最差嘅情況係得一個泛民當選，所以依家喺街站度，我都會呼籲大家，支持多兩個民主派入議會，就算俾我選到，得一個人點打？我都會想多兩個人入黎一齊打。但首先要其他民主派支持者碎片肯歸隊先得。」何又稱，必須尊重選民的決定，但認為自己今日可以在議會發揮的作用仍大，「正正因為今屆多新人，所以需要有議會經驗既人去講番啲歷史出黎，先可以同班建制派格劍」。