西環麥當勞斬人．有片｜員工哭叫救命　經理披血問：做咩畀佢走咗

西環皇后大道西麥當勞斬人案，29歲男職員斬傷38歲男經理後逃去，其後落網；中刀經理經搶救後，情況危殆。網上流傳案發後的片段，可見遇襲男經理頭頸重創，用手掩着後頸，滿身鮮血。在旁其他員工及食客則嚇至大叫救命，甚至受驚落淚，經理一度問﹕「做咩畀佢（疑兇）走咗呀？」

從網上片段可見，遇襲男經理血流披面，上半身制服幾乎全被「染紅」，一名身形健碩的背心男疑為控制場面，一度從後緊抱該名男經理及叫人「幫手」，經理則稱：「靚仔，你放手先啦！」在場其他員工及食客見狀，慌忙着受傷經理坐下，並上前查問「做咩事呀，做咩打交呀？」

有員工查看後發現經理血流如注，手掩後頸，驚覺傷勢嚴重，立即遞上紙巾，慌稱：「哎呀救人呀，救命呀，警車嚟未呀救命呀！」另一名身穿黑色制服的女員工協助處理經理的後頸傷口時，更疑受驚跺腳驚呼：「嗚‥‥‥個頭呀，個頭呀！」受傷經理一度問：「做咩畀佢（疑兇）走咗呀？」他其後趴在餐桌上及打電話，員工則專注其傷勢指，「走咗唔緊要呀！」