馬鞍山47歲休班警涉偷拍裙底斷正　周四提堂

一名47歲休班男警今年2月於馬鞍山新港城中心，涉嫌偷拍一名女子裙底，被途人截停並落網。警方今日（29日）指已控告該名男警一項「非法拍攝或觀察私密部位」罪，案件將於明天（30日）於沙田裁判法院提堂。

事發今年2月9日晚上7時許，涉案姓區男警涉嫌於馬鞍山新港城中心內一間超市，以手機偷拍一名22歲女子裙底，男警登時逃走，惟其後被途人截停，警方其後以涉嫌「非法拍攝或觀察私密部位」將他拘捕。

網上片段拍得，當時一名束馬尾的男子，於商場內截停涉偷拍男子，一手捉住其衣領，並喝罵「你無事又走去『較腳』？呢個X樣影裙底呀！我捉賊呀」，數名保安在旁安撫，男子又稱「唔好摸我電話呀！破壞證物呀，唔好以為我紋X哂身唔X識規矩呀」。一名相信為商場男職員在旁稱「唔好咁勞氣，等差人嚟，佢無得走喇咁多人喺度」，男子再稱「你無得走喇，企埋一邊唔好阻住人做生意」。