【元旦遊行】19歲仔被捕單親母警署淚崩　泣訴政見分歧母子變仇人

「我唔知點算！我唔知點算！咁辛苦養到佢咁大個！」北角警署高高的水馬外，雙眼通紅的單親媽媽Eva（化名）日夜留守，等待19歲兒子保釋。過去半年， Eva因政見分歧，與兒子關係跌至冰點，她形容與兒子關係變得猶如「仇人」，曾足足有一個月，兩母子不瞅不睬。元旦日深夜，她接獲電話通知，兒子因遊行被捕，「我真係好擔心，唔想我個仔人生有咩污點、留案底。」Eva在警署門外淚崩，哭訴擔心兒子前途盡毀，「被捕者需為自己人生、犯事後果負責，無人可以為佢人生負責！」

大家成日係屋企都唔講嘢，大家都好似仇人！我好心痛，如果我個仔有份參加破壞，我更加之心痛！

中學老師來電指　其子於示威中被捕

元旦日晚上11時許，Eva接獲兒子的中學老師來電指，她19歲的兒子，於銅鑼灣被捕。Eva當刻六神無主，透過民陣的法律團隊，知悉兒子在北角警署扣留。「我唔知點算，咁辛苦養到佢咁大個！我真係好擔心我個仔，唔想我個仔人生有咩污點、留案底。」這兩天，Eva隻身到警署外守候，與其他被捕者親友等待保釋日。

因政見分歧　與兒子爭執

「嘈過無數次，試過成個月都唔講嘢，大家都唔講嘢，個家庭都撕裂喇！」回想過去半年因政見分歧，經常與兒子爭執，她坦言「誰是誰非」難用三言兩語解釋，她指不反對市民表達訴求。作為家長，Eva並不希望兒子上前線，「無錯！你哋為香港爭取未來，但係未爭取未來前，推一大班人出去，佢哋無咗佢嘅未來。」

化解分歧在乎是否願意聆聽　了解子女為何付出

反修例風波中，家長與子女因政見不同而爭執不在少數，Eva的個案並不罕見。經常站在前線的陣地社工陳虹秀表示，兩代人能否化解分歧，關鍵在於父母是否願意聆聽子女的意見，如家長單向要求子女「唔好出去」或以「斷米糧」等手段威脅子女，年輕人難免反感，或會放棄與家長溝通，避免爭吵。 

陳虹秀認為是次個案，涉事家長雖然較為保守，但亦要先關心母親的情緒需要、肯定她對兒子的愛，然後了解母親對兒子有何期望及擔憂。陳希望，不論二人政見如何，應先盡可能避免關係惡化。

零溝通未必是壞事　或代表雙方不想關係破裂

陳認為，涉事母親與兒子「唔講嘢」其實未必是壞事。她解釋，母親或會覺得在家中與兒子零溝通，「好似無咗個仔咁」，但這同時證明雙方不想關係再度惡化、甚至破裂，「如果仔仔想吵大鑊，（嚴重）可以離家出走……有時HOLD係呢個位（零溝通），也是一種解決方法。」陳希望該名家長持開放態度，要主動了解子女為何付出、要聆聽及接觸多些資訊，才能有助溝通。

區議員好言安慰　Eva：我只想安居樂業

Eva與記者傾談期間，一度哭訴。區議員黎梓欣上前協助，也跟Eva分享自己約14歲時時，也因關心社運，跟家人也有爭拗，「屋企內，可以有政見唔同」，她試著好言安慰，也告訴Eva，坊間的求助方法。Eva只回應：「邊個做特首，我唔理，我只想要安居樂業。無㗎啦，佢（兒子）人生完啦！」

我唔理你哋啲訴求係乜嘢，我唔想啲仔女參加。我哋唔做偉大的人，我只係想做一個小市民。

Eva哭訴：我要生要死，都唔畀佢出去！

「我唔想個仔做唔守法嘢，用我個仔嘅人生，幫你哋去衝、去攞票，不過佢第日無架啦。」Eva指，她等到兒子15歲時，才讓他上網，兒子平時喜歡瀏覽「連登」，平日亦有參與不同類型示威活動，每次兒子都是靜悄悄離家，「我要生要死，我都唔畀佢出去，佢講大話呃我返工。」Eva指近期太多示威，她不想經常打電話「約束」兒子，想不到新年伊始，兒子於示威中被捕。

擔心兒子留案底「無人可為佢人生負責」

「如果因為呢場運動，令佢哋留案底，我真係想死！我可以用我下半生去維護佢，你哋可以咩？」淚崩的Eva認為，被捕者需為自己人生、犯事後果負責，「我好心痛，如果我個仔有份參加破壞，我更加之心痛。無人可以為佢人生負責，佢只可以為自己負責！」 

「根本你哋每次搞遊行，根本無可能評估係『和平』！係一少部分人『連累』大部分人，你哋根本控制唔到，嗰少部分人！」

淺黃與深黃都有爭拗　社工：切忌「閂埋對耳」

華員會社工主任分會主席梁建雄認為，該名母親要有聆聽兒子意見的耐性，「縱使你唔理解、唔認同對方嘅立場，你都要聽。你唔聽就一定唔會明佢（兒子）想點。」梁建雄指，這位母親也許立場保守，或有國內生活背景，教育程度未必好高。而今次運動中，年青人追求祟高的理念。對於母親而言，這此理念可能太過遙遠，或根據其過往生活經驗，母親會覺得參與社運會受傷，且不會成功，故只會關心是否食得飽、有無一份好工，能否成家立室等問題。
   
梁建雄表示，父母關心的東西沒有問題，但亦需要主動了解子女不是為私利，而是為社會爭取更好的未來。梁續指，這場運動中，不止黃藍之間有爭執，即使持相同政見也會有分歧，例如有父母係淺黃，子女係深黃，兩者都有爭執，故重點係雙方不可以「閂埋對耳」、拒絕了解及溝通。