【高買直擊・有片】旺角遇竊店主發片緝匪 善意「提醒」記住畀錢
【20：30更新】經理Jason指出，片段中懷疑偷竊的孕婦未有現身，老闆已前往警署報案求助。
▼男入店「掃貨」 大肚婆店外「睇水」
鴛鴦賊高買被天眼直擊，店主發片「提醒」兩人畀錢！一名男網民凌晨在facebook「香港花生友」群組發出有相有片的「緝匪帖文」，報稱昨晚（12日）約10時47分，位於西洋菜南街4號的手機配件店被賊人「光顧」。片中可見一名身穿綠色恤衫及淺藍色牛仔褲的中年漢，偕另一名身穿黑色背心連身裙的孕婦前往上址，其中大肚婆狀似於門外「睇水」，男方則進入店內，非常有目標地走向其中一行配件架。
▼掀褲將貨放入臂部 大肚婆「煲煙」再順手牽羊
該名中年漢入店後，不消幾秒便極速將一件小型貨品放入左後褲袋，然後更直接掀開褲頭，將另一件疑似是車用充電器的盒裝產品放入臀部；接二就連三，最後他再將另一盒同款產品放入左邊褲袋才步出店外；而孕婦則一邊「煲煙」一邊扮光顧，當男方離開時，她亦順手牽羊，拿走一件相信是夾式手機支架的盒裝貨品，即兩人共偷去四件貨品。
▼帖主「提醒」要畀錢 網民讚：真係好有品
相信是店主的男網民發現事件後，凌晨2時許發帖緝匪，並表示懸紅2,000元一位，即共4,000元尋找兩名賊人，他更好心「提醒」兩名疑人，「如閣下忘記付款，請於8月13號晚上六點前帶同物件前來店舖付款，否則報警處理」最後他指如尋獲兩人，可WhatsApp聯絡帖主。有網民稱讚帖主提醒之舉「真係好有品」，而警方表示暫未接獲相關報案。`
▼欲網開一面 經理：冇理由要個BB喺監獄出世
店舖經理Jason向《香港01》表示，於上址工作逾兩年， 首次遇到孕婦盜竊，「見個肚都大 ，差唔多生得 ，冇理由要個BB喺監獄出世，咁會害咗個BB，請示過老細，希望畀個機會佢」。
Jason憶述，昨晚約11時，同事收舖前執貨架，「發現唔見兩件嘢（貨）」，遂翻看CCTV。片段顯示，昨晚約10時46分，中年男犯案時，孕婦則一邊「煲煙」一邊扮光顧。Jason稱，過往發現不少年青人偷走店內電話線或電話殼，會立刻翻看CCTV，並將CCTV片段交予警方，惟今次見事主為孕婦，盼網開一面。
Jason又指，「佢哋兩個（賊人）都係成年人，佢哋兩個做咩我控制唔到……佢嚟偷嘢就唔啱， 但BB好似好無辜」。
Jason慨嘆，「我見到段片都好無奈，冇遇過類似情況，冇試過懸紅，希望盡快搵到佢哋……希望佢哋睇到懸紅，6點前過到嚟」。